ޕާޓީ ބަދަލުކުރުމުން ގޮނޑި ގެއްލޭ އިސްލާޙް ގާނޫނުއަސާސީއަށް ގެންނަން ޕީއެންސީން ނިންމައިފި ކަމަށް އިތުބާރުހުރި މަސްދަރަކުން މަޢުލޫމާތު ލިބިއްޖެއެވެ.

މަޢުލޫމާތު ލިބިފައިވާ ގޮތުގައި ޕީއެންސީން ބޭނުންވަނީ މަޖިލީސް މެންބަރުން ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީ އިސްލާހުކުރަން މާދަމާ ރައްޔިތުންގެ މަޖިލީހަށް ހުށައެޅުމަށެވެ. އަދި ވީއެންމެ އަވަހަކަށް އެ އިސްލާޙު ފާސްކުރުމަށް ޕީއެންސީން މަސައްކަތް ކުރާކަމަށްވެސް މަޢުލޫމާތު ލިބިފައިވެއެވެ.

ޕީއެންސީން ޤާނޫނު އަސާސީ އިސްލާޙު ކުރުމުގެ މަސައްކަތް މާދަމާ ފެށުމަށް ތައްޔާރުވެފައިވާކަމުގެ އަޑުތައް ފެތުރިފައިވާއިރު މަޖިލިސް މެންބަރުން މަޖިލީހަށް އިންތިހާބުވާ ޕާޓީ ބަދަލުކުރުމުން ގޮނޑި ގެއްލޭގޮތަށް ފަރުމާކޮށްފައިވާ އެންޓި-ޑިފެކްޝަން ގާނޫނުގެ ބައެއް މާއްދާާތައް އުވާލަން އަމިއްލަ ފަރާތަކުން މިހާރުވަނީ ހައިކޯޓަށްވެސް ހުށައަޅާފައެވެ.

ނަމަވެސް މިކަމާގުޅޭ ގޮތުން ޕީއެންސީން ރަސްމީކޮށް މިހާތަނަށް އެއްވެސް ބަހެއް ބުނެފައެއް ނުވެއެވެ.

އެންޓި ޑިފެކްޝަން ގާނޫނުގެ ދަށުން ޕާޓީ ބަދަލު ކުރުމުން އިންތިޚާބީ މަޤާމުތައް ގެއްލޭ "އެންޓި-ޑިފެކްޝަން ބިލު" މަޖިލީހުގެ މެންބަރުންނާއި، ކައުންސިލަރުންގެ މައްޗަށްވެސް ތަންފީޒު ކުރެވެ އެވެ.

އަދި ޕާޓީ ބަދަލުކޮށްފިނަމަ އިސްތިއުފާ ދޭންޖެހޭނެ ތިން ހާލަތެއް އެ ޤާނޫނުގައި ވަނީ ބަޔާންކޮށްފައެވެ. އެ ތިން ހާލަތަކީ އިންތިހާބުވި ޕާޓީން އަމިއްލައަށް ވަކިވުން، އިންތިހާބުވި ޕާޓީ ނޫން އެހެން ޕާޓީއަކަށް ސޮއިކުރުން އަދި އަމިއްލަގޮތުން އިންތިޚާބުވެފައި ޕާޓީއަކަށް ސޮއިކުރުމެވެ.

ޕާޓީ ބަދަލުކޮށްފިނަމަ ގޮނޑި ގެއްލޭ ގޮތަށް އެންޓި-ޑިފެކްޝަން ޤާނޫނު ފާސްކުރީ އެމްޑީޕީގެ މެޖޯރިޓީ އޮތް 19 ވަނަ މަޖިލީހުގައެވެ.