ރައްޔިތުންގެ މަޖިލީހުން މިހާރު އުޅެނީ ހަޑިހާވަން ކަމަށާއި މީގެ ކުރިންވެސް އެގޮތަށް އުޅެގެން ފާޅުވީ 12 މެންބަރުން ކަމަށް ދަނގެތީ ދާއިރާގެ ކުރީގެ މެމްބަރު އިލްހާމް އަހުމަދު ވިދާޅުވެއްޖެއެވެެ.

އިލްހާމް މިހެން ވިދާޅުވެފައިވާއިރު ރައްޔިތުންގެ މަޖިލީހަށް އިންތިހާބުވާ މެންބަރުން ޕާޓީ ބަދަލު ކޮށްފިނަމަ މެންބަރުކަމުގެ ގޮނޑި ގެއްލޭ ގޮތަށް ވެރިކަންކުރާ ޕީއެންސީން ވަނީ ޤާނޫނު އަސާސީއަށް އިސްލާހެއް ހުށައަޅުއްވާފައެވެ.

އެ އިސްލާޙާ ގުޅިގެން އިލްހާމް ވިދާޅުވީ ރައްޔިތުންގެ މަޖިލީހުގެ މެމްބަރުން ވަކިކުރުމުގެ ބާރު އޮންނަންވާނީ އެ މެންބަރަކު އިންތިޚާބުކުރި ދާއިރާގެ ރައްޔިތުންގެ އަތުގައި ކަމަށެވެ. އޭގެ އިތުރުން ރައްޔިތުން އިންތިޚާބުކުރި މީހަކު، ސިޔާސީ ޕާޓީއެއްގެ ދެތިންމީހެއްގެ ކޮމެޓީީއަކުން ވަކިކުރެވޭނީ ކޮންހަަމައަކުންތޯ އިލްހާމް ވަނީ ސުވާލު އުފައްދަވާފައެވެ.

"މީގެ ކުރިންވެސް ތިހަޑިހާވަން އުޅެގެން 12 ފާޅުވީ!" ރައީސް ޔާމީންގެ ވެރިކަމުގައި އެކުލަވާލި އެންޓި ޑިފެކްޝަން ޤާނޫނުގެ ދަށުން މަޖިލީހުގެ މެންބަރުކަމުގެ ގޮނޑި ގެއްލުނު އިލްހާމް ވިދާޅުވިއެވެ.

އިލްހާމް މިކަންބޮޑުވުން ފާޅު ކުރަށްވާފައިވާއިރު މަޖިލީހުގެ މެންބަރުން އިންތިޚާބުވެފައިވާ ޕާޓީ ބަދަލުކުރުމުން ގޮނޑި ގެއްލޭ އިސްލާޙް ގާނޫނުއަސާސީއަށް ގެންނަން ޕީއެންސީން މަޖިލީހަށް ހުށައެޅި މައްސަލައިގެ ބަހުސް މިއަދުގެ މަޖިލީހުގެ ޖަލްސާގައި ވަނީ ފަށާފައެވެ.

ޤާނޫނު އަސާސީއަށް އެބަދަލު ގެނައުމުގެ މަސައްކަތް ފަށާފައިވާއިރު 19 ވަނަ މަޖިލީހުގައި ފާސްކުރި އެންޓި ޑިފެކްޝަން ގާނޫނުގެ ދަށުން ޕާޓީ ބަދަލު ކުރުމުން އިންތިޚާބީ މަޤާމުތައް ގެއްލޭ "އެންޓި-ޑިފެކްޝަން ބިލު" މަޖިލީހުގެ މެންބަރުންނާއި، ކައުންސިލަރުންގެ މައްޗަށްވެސް ތަންފީޒު ކުރެވެއެވެ.

އަދި ޕާޓީ ބަދަލުކޮށްފިނަމަ އިސްތިއުފާ ދޭންޖެހޭނެ ތިން ހާލަތެއް އެ ޤާނޫނުގައި ވަނީ ބަޔާންކޮށްފައެވެ. އެ ތިން ހާލަތަކީ އިންތިހާބުވި ޕާޓީން އަމިއްލައަށް ވަކިވުން، އިންތިހާބުވި ޕާޓީ ނޫން އެހެން ޕާޓީއަކަށް ސޮއިކުރުން އަދި އަމިއްލަގޮތުން އިންތިޚާބުވެފައި ޕާޓީއަކަށް ސޮއިކުރުމެވެ.