މާލެއަތޮޅު ތިލަފުށީ ފަޅުތެރޭގައި އަޅާފައި ހުރި އުޅަނދުތަކެއް ނެގުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފިއެވެ.

އެޗްޑީސީން މިއަދު ވަނީ މި އުޅަނދުތައް ނަގަންވީ ކޮން ސަރަހައްދަކުން ކަން އަންގައިދޭ ޗާޓެއްވެސް އާންމުކޮށްފައެވެ.

އެޗްޑީސީން ނެރުނު ބަޔާނެއްގައި ބުނީ ތިލަފުށީ ފަޅުތެރޭ ސަރަހައްދުގައި ގަވައިދާ ޚިލާފަށް އަޅާފައިވާ އުޅަނދުތައް ނަގައި އެ ސަރަހައްދު ސާފުކުރުމުގެ މަސައްކަތް ކުރަމުން އަންނަ ކަމަށެވެ.

ހިއްސާކޮށްފައިވާ ޗާޓުގައިވާ ސަރަހައްދުގައި ހުރި އެއްވެސް އުޅަނދެއްގެ ވެރިފަރާތެއް ވާނަމަ، ތިލަފުށި އޮޕަރޭޝަންސް ޑިޕާޓްމަންޓް ނަންބަރު 9398888 އަށް ގުޅައި މައުލޫމާތު ސާފުކުރުމަށް އެ ކޯޕަރޭޝަނުން އަންގާފައިވެއެވެ. އަދި މިއަދުން ފެށިގެން 15 ދުވަހުގެ ތެރޭގައި މި އުޅަނދުތައް ނެގުމަށް އެޗްޑީސީން ވަނީ މުހުލަތެއް ދީފައެވެ.

ފަޅުތެރޭގައި ހުރި އުޅަނދުތައް ނެގުމަށް ކުރި އިއުލާނުގައި އެ ކޯޕަރޭޝަނުން ވަނީ ދީފައިވާ މުއްދަތުގައި އުޅަނދުތައް ނަގާފައި ނުވާ ނަމަ، މިއީ ވެރިފަރާތުން ބޭނުން ނެތިގެން ދޫކޮށްލާފައިވާ އުޅަނދުތަކެއް ކަމަށް ބަލައި އެޗްޑީސީން ކަނޑައަޅާ ގޮތެއްގެ މަތިން އުޅަނދުތަކާ މެދުގައި އަމަލު ކުރާނެ ކަމަށް އަންގާފައެވެ.