ޕީއެންސީގެ އެތެރޭގެ އިންތިހާބުގެ ވޯޓުލުން މިއަދު ހެނދުނު 10:00 ގައި މުޅި ރާއްޖޭގައި ފަށާފައިވާއިރު ވޯޓަކާ ނުލައި 1300 ކެންޑިޑޭޓުން ހޮވިފައިވާ ކަމަށް އެ ޕާޓީން ހާމަކޮށްފިއެވެ.

ޕީއެންސީން ޢާއްމު ކޮށްފައިވާ ތަފާސް ހިސާބުތައް ދައްކާގޮތުން 1984 މަޤާމަށް މީހުން އިންތިޚާބު ކުރުމަށް ހަމަޖެހިފައިވާ މި އިންތިޚާބުގައި 648 ކެންޑިޑޭޓުން ވާދަކުރައްވައެވެ. އަނެއް 1300 މަޤާމަށް، އެންމެ ކެންޑިޑޭޓަކު ކުރިމަތިލައްވާފައިވާތީ، އެ 1300 މަޤާމަށް ވަނީ، އިންތިޚާބަކާ ނުލައި މީހުން ހޮވިފައެވެ.

ޕީއެންސީ އިން ބުނީ އިންތިހާބުގައި ވޯޓުލުން ކުރިޔަށް ދާނީ ގއ، ގދ، ލ، ތ، މ، ދ، އއ، ކ، ބ، ރ، ނ، ޅ، ށ، އދ، ސ، ޏ، ހއ އަދި ހދ އަތޮޅުގެ ރަށްތަކުގައި ކަމަށެވެ. މި އަތޮޅުތަކުން ވޯޓުލުން ކުރިއަށްދާ ރަށްތައް ޕީއެންސީން ވަނީ އިއުލާން ކޮށްފައެވެ.

ކޮންގްރެސް ޕާޓީގެ އެތެރޭގެ އިންތިޚާބުގައި ވޯޓުލުން ކުރިޔަށް ދާނެ ރަށްތައް.

އަތޮޅުތައް: މ، ދ، އއ، ކ#DhaairaInthikhaabu2024 #DhiveheengeRaajje#CongressPartyMV pic.twitter.com/fh0tcM7OiA

— PNC Secretariat (@pnc_secretariat) November 21, 2024

މިއަދު އިންތިހާބުގައި ވޯޓުލުން ކުރިއަށްދަނީ މާލެ ހިމެނޭހެން 88 ރަށެއްގަ އެވެ. މާލޭގައި ދަރުބާރުގޭގައި ބަހައްޓާފައިވާ 56 ފޮށީގެ އިތުރަށް ރަށްރަށުގައިވެސް ފޮށިތައް ބަހައްޓާފައިވެ އެވެ.

ޕީއެންސީގެ އެތެރޭގެ އިންތިހާބުގައި އިންތިހާބުކުރަން ހަމަޖެހިފައިވާ މަގާމުތަކުގެ ތެރޭގައި ދާއިރާތަކުގެ ރައީސުންނާއި ނައިބު ރައީސުންނާއި ޒުވާނުންގެ ހަރަކާތުގެ ރައީސް އާއި އަންހެނުންގެ ހަރަކާތުގެ ރައީސްގެ އިތުރުން ސްޓިއަރިން ކޮމެޓީގެ މެމްބަރުން ހިމެނެ އެވެ.

މިއަދު ހެނދުނު 10:00 ގައި ފެށި މި އިންތިޚާބުގެ ވޯޓުލުން ނިމި ވޯޓް ފޮށިތައް ބަންދުކުރާނީ މިއަދު މެންދުރު 14:00 ގައެވެ.