ސިޔާސީ ހިސާބުން ދައްކާ ގޮތުން، ރާއްޖޭގައި ޢަމަލުކުރަމުން އަންނަ ފެހި ޤާނޫނު އަސާސީގެ ދަށުން ރިޔާސީ ދެވަނަ ދައުރެއް ފުރިހަމަކުރައްވާނެ ފުރަތަމަ ރައީސަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގަންނަވާނެކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

ދައުލަތުގެ މީޑިޔާ، ޕީއެސްއެމްގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް ޢަބްދުއްރަޙީމް ވިދާޅުވީ އެމަނިކުފާނު ސިޔާސީ ހިސާބު ޖައްސަވަނީ ރާއްޖޭގެ ސިޔާސީ މަސްރަޙު ވަރަށް ބޮޑަށް އެނގިވަޑައިގެން ހުންނަވަައިގެން ކަމަށެވެ. އަދި އެމަނިކުފާނުގެ ސިޔާސީ ހިސާބުން ފެންނަގޮތުން ރާއްޖޭގައި ޢަމަލުކުރަމުން އަންނަ ފެހި ޤާނޫނު އަސާސީގެ ދަށުން ރިޔާސީ ދެވަނަ ދައުރެއް ފުރިހަމަކުރައްވާނެ ފުރަތަމަ ރައީސަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގަންނަވާނެކަމަށް ޢަބުދުއްރަޙީމް ވިދާޅުވިއެވެ. މަޖިލީހުގެ ރައީސް ޢަބުދުއްރަޙީމް ވިދާޅުވީ ރާއްޖޭގެ ހުރިހާ ރަށެއްގެ ސިޔާސީ ފިކުރާ އާންމު ރައްޔިތުންގެ ވިސްނުން އެނގިވަޑަައިގަންނަވާ ކަމަށެވެ.

"އެހާވަރަށް އަޅުގަނޑަށް މިރާއްޖެ އެނގޭ. އެހެންވީމަ އެނގިގެން ހިސާބު ޖެހީމަ ހިސާބު ދިމާވަނީ." ރައްޔިތުންގެ މަޖިލީހުގެ ރައީސް ވިދާޅުވިއެވެ.

މީގެ އިތުރުން މަޖިލީހުގެ ރައީސް ޢަބުދުއްރަޙީމް ވިދާޅުވީ، ރައީސް ޑރ. މުޙައްމަދު މުޢިއްޒުގެ ސަރުކާރު ވަރަށް ކާމިޔާބުކަމާއެކު ކުރިއަށްދާ ކަމަށް ފެނިވަޑައިގަންނަވާ ކަމަށެވެ. އެހެންނަމަވެސް، ކޮންމެ ސަރުކާރަކަށްވެސް ގޮންޖެހުންތަކާ ކުރިމަތިލާން ޖެހޭނެ ކަމަށް އަބުދުއްރަޙީމް ވިދާޅުވިއެވެ. އަދި އެ ގޮންޖެހުންތަކާއި ފާޑުކިޔުންތަކަށް ކުރިމަތިލައި، އެކަންކަމާ ކެރިގެން ކުރިމަތިލުމަކީ ކާމިޔާބީއަށް މަގުފަހިވާނެ ކަމެއް ކަމުގައި މަޖިލީހުގެ ރައީސް ޢަބުދުއްރަޙީމް ފާހަގަކުރެއްވިއެވެ.

އިތުރަށް ވާހަކަފުޅު ދައްކަވަމުން ޢަބުދުއްރަޙީމް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ރައްޔިތުންގެ ތާއީދު އިތުރުވަމުންދާކަމަށާއި އެހެން ސިޔާސީ ލީޑަރުން ސިޔާސީ މަޝްރަޙުން ގެއްލިގެންދާ މަންޒަރު ފެންނަމުންދާ ކަމަށެވެ. އަދި މި ޙާލަތު މެދުވެރިވަނީ އެ ސިޔާސީ ލީޑަރުންގެ އަމިއްލަ ޢަމަލުތަކާއި ވިސްނުންތަކުގެ ސަބަބުން ކަމަށްވެސް އެމަނިކުފާނު ވިދާޅުވިއެވެ.