އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ސޯޝަލް ވޯކަރުންނަށް އަމާޒުކޮށްގެން ކުރިއަށް ގެންދާ ސްކިލްސް އެންހޭންސްމަންޓް ޕްރޮގްރާމް ފޯރ ސޯޝަލް ވަރކަރސްގެ ދެވަނަ ބެޗުގެ ސެޝަންތައް ފަށާފައިފިއެވެ.

މިއަދު ފެށި މި ޕްރޮގްރާމާ ގުޅޭގޮތުން އިޖްތިމާއީ ތަރައްގީއާއި ބެހޭ ވުޒާރާއިން ބުނީ މިއީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދާ އެއްގޮތަށް، މުވައްޒަފުންގެ ޚިދުމަތުގެ ފެންވަރު އިތުރަށް ހަރުދަނާކޮށް، ރައްޔިތުންނާ ގާތުން، އަވަހަށް ޚިދުމަތް ފޯރުކޮށްދިނުމަށް ބާރުއެޅުމުގެ ގޮތުން ހިންގާ ޕްރޮގްރާމެއް ކަމަށެވެ.

އެ ވުޒާރާއިން ބުނީ މި ޕްރޮގްރާމްގެ މައިގަނޑު މަގްސަދަކީ، އެ ވުޒާރާގައި މަސައްކަތްކުރާ ސޯޝަލް ވޯކަރުންނަށް ބޭނުންވާ ފަންނީ އިލްމާއި ތަމްރީނާއި ހުނަރު ފޯރުކޮށްދިނުން ކަމަށެވެ. އަދި ޚިދުމަތް ފޯރުކޮށްދިނުމުގައި، އެއް މިންގަނޑަކުން އަމަލު ކުރެވޭކަން ކަށަވަރުކުރުމާއި، ދެވޭ ޚިދުމަތުގެ ފެންވަރު ރަނގަޅުކުރެވޭނެ ކަމަށް ވުޒާރާއިން މައުލޫމާތުދެއެވެ.

މި ތަމްރީނު ޕްރޮގްރާމްގެ ތެރެއިން، ހުށަހެޅޭ މައްސަލަތަކުގައި، ކުރެވޭ ވޭދަނައިގެ މަސައްކަތުގައި، މިވަގުތު ކޭސް ވޯކަރުންނަށް ކުރިމަތިވެފައިވާ ފަންނީ ގޮންޖެހުންތައް ދެނެގަނެ، ތަމްރީނުފޯރުކޮށް ދެވިގެންދާނެ ކަމަށް ވުޒާއިން ބުނެއެވެ.

އިޖްތިމާއީ ތަރައްގީއާއި ބެހޭ ވުޒާރާއިން ބުނީ މި ޕްރޮގްރާމުގެ މައިގަނޑު އެއް އަމާޒަކީ، ވަށާޖެހޭފަދަ ޚިދުމަތްތަކެއް އާއިލީ ނަޒަރަކުން ފޯރުކޮށްދީ، ހުށަހެޅޭ މައްސަލަތަކުގައި ކޮންމެ އާއިލާއަކަށް ކޭސްވޯކަރަކު ހަމަޖެހި، ލުއިފަސޭހަ ގޮތެއްގައި، އިތުބާރު ކުރެވޭފަދަ ޚިދުމަތެއް ފޯރުކޮށްދިނުން ކަމަށެވެ. އަދި އެ ތަމްރީނު ޕްރޮގްރާމްގެ ޒަރީއާއިން އެ އަމާޒަށް ވާސިލުމުވަށް ސޯޝަލް ވޯކަރުން ތަމްރީނު ކުރެވިގެންދާނެ ކަމަށް ވުޒާރާއިން ބުނެއެވެ.