މިދިޔަ ޖުލައި މަހުގެ 24ވަނަ ދުވަހުގެ ވަގުތެއްގައި މއ. މަސްފަން ގެއަށް ދިވެހި ފިރިހެނަކު ވައްދައި އެ މީހާއަށް ވަޅިން ބިރުދައްކައި ބަރަހަނާކޮށް، ފޭރުނު މައްސަލައިގައި ދައުލަތުން ދައުވާ ކުރި ތިން މީހުންގެ މައްޗަށް ކުށް ސާބިތުވާ ކަމަށް ކްރިމިނަލް ކޯޓުން ހުކުމްކޮށްފިއެވެ.

މި މައްސަލާގައި ދައުލަތުން ދައުވާކޮށްފައިވަނީ މއ. މަސްފަން، އާއިޝަތު އާއި މއ. މަސްފަން، މުހައްމަދު ރީހާން އަދި ސ. ހިތަދޫ / ސޯމާ، ޝަފީގު އިބްރާހީމްގެ މައްޗަށެވެ. އެ ތިން މީހުންގެ މައްޗަށް ދައުލަތުން ވަނީ ތިން ދައުވާ އެއް އުފުލާފައެވެ. އެއީ އަނިޔާއެއް ދިނުމުގެ ދައުވާ އާއި އެނގިހުރެ ހުއްދަ ނޫން ގޮތެއްގައި މައުލޫމާތު ހޯދުމުގެ ދައުވާ އާއި ފޭރުމުގެ ދައުވާ އެވެެ. އެދައުވާތައް އެ ތިން މީހުންގެ މައްޗަށް ސާބިތުވެފައިވަނީ އަމިއްލަ އިއުތިރާފުންނެެވެ.

ކްރިމިނަލް ކޯޓުން މިދިޔަ ބުރާސްފަތި ދުވަހު ކުރި ހުކުމުގައި ބުނެފައިވަނީ މއ. މަސްފަން، އާއިޝަތު އާއި މއ. މަސްފަން، މުހައްމަދު ރީހާން އަދި ސ. ހިތަދޫ / ސޯމާ، ޝަފީގުގެ އަމިއްލަ އިއުތިރާފުން އަނިޔާއެއް ދިނުމުގެ ދަޢުވާ ސާބިތުވެފައިވާތީ އެތިން މީހުން 18 ދުވަހުގެ މުއްދަތަށް ޖަލަށްލުމަށް ހުކުމްކުރާ ކަމަށެވެ. އަދި އެނގިހުރެ ހުއްދަ ނޫން ގޮތެއްގައި މައުލޫމާތު ހޯދުމުގެ ދައުވާ އެ ތިން މީހުންގެ އިއުތިރާފުން ޝަރީއަތަށް ސާބިތުވާތީ 04 މަހާއި 24 ދުވަހުގެ މުއްދަތަށް ޖަލަށްލުމަށް ވަނީ ހުކުމްކޮށްފައެވެެ.

މީގެ އިތުރުން ފޭރުނު މައްސަލައިގައި ދައުލަތުން މއ. މަސްފަން އާއިޝަތު އާއި ހަމައެގޭ މުޙައްމަދު ރީހާނުގެ މައްޗަށް އުފުލި ދައުވާ ސާބިތުވާތީ 5 މަހާއި 23 ދުވަހުގެ މުއްދަތަށް ޖަލަށް ލުމަށް ހުކުމްކޮށް ޝަފީޤު އިބްރާހީމް 9 މަހާއި 18 ދުވަހުގެ މުއްދަތަށް ޖަލަށް ލުމަށް ވަނީ ހުކުމްކޮށްފައެވެ. އެހެން ނަމަވެސް ޝަފީޤު އެމައްސަލައިގައި ބަންދުގައި 30 ދުވަސް ހޭދަކޮށްފައިވާތީ އޭނާ ތަންފީޒު ކުރަންޖެހޭނީ 08 މަހާއި 18 ދުވަސް ކަމަށް ކްރިމިނަލް ކޯޓުން ވަނީ ކަނޑައަޅާފައެވެ.

މިހުކުމާއި އެކު އާއިޝަތު އާއި ރީހާނު އަދި ޝަފީޤު ގާތްގަނޑަކަށް 1 އަހަރާއި 3 މަހުގެ ހުކުމެއް ތަންފީޒުކުރަންޖެހޭނެއެވެ.

މިމައްސަލައިގައިފުލުހުން ކޯޓުގައި ބުނެފައިވަނީ އަނިޔާ ލިބުނު މީހާ މަސްފަންގެ އަށް ވެއްދި ކަމަށް ބެލެވެނީ އަންހެނެއް ކަމަށެވެ. އޭނާ އެ ގެއަށް ވަނުމުން ދެ ފިރިހެނުން އޭނާ ހިފަހައްޓައި، ވަޅިއަކުން ބިރުދައްކައި ބަރަހަނާކޮށް، އޭނާގެ ފޯނު އަތުލި ކަމަށްފުލުހުން ބުނެއެވެ.

އަދި އޭނާގެ އެކައުންޓުން އެހެން އެކައުންޓަކަށް 20،000ރ. ފޮނުވާފައިވާ ކަމަށާއި އަނިޔާ ލިބުނު މީހާގެ ކާޑު ބޭނުންކޮށްގެން އޭޓީއެމުން 25،000ރ. ނަގާފައިވާ ކަމަށް ވެސް ފުލުހުން ބުންޏެވެެ.

އެހާދިސާ ހިނގި މަސްފަންގެ އަކީ ތަކުރާރުކޮށް މީހުން އެގެއަށް ވައްދާ ބަރަހާނަކޮށް ފޭރުމުގެ ރިކޯޑް އޮންނަ ގެއެެކެވެ. މިމައްސަލައިގައި ހުކުމްކޮށްފައިވާއިރު މިމައްސަލައިގައި ދައުލަތުން ދައުވާ ކުރި މއ. މަސްފަން، އާއިޝަތު އާއި މއ. މަސްފަން، މުހައްމަދު ރީހާން ހުރީ ޝަރީއަތް ނިމެންދެން ބަންދުކޮށްފައެވެ. އެހެން ނަމަވެސް އެމައްސަލައިގައި ޝަރީއަތް ނިމެންދެން ސ. ހިތަދޫ / ސޯމާ، ޝަފީގު ބަންދު ކޮށްފައި ހުއްޓާ 30 ދުވަސް ފަހުން ފުލުހުން އޭނާ ވަނީ ދޫކޮށްލާފައެވެ. އޭނާ ދޫކޮށްލި ސަބަބެއް ފުލުހުން ހާމައެއް ނުކުރެއެެވެ. ޝަފީޤު ދޫކޮށްލި ފަހުން އިތުރު މީހެއްގެ އަތުން ފޭރުނު މައްސަލައެއްގައި ފުލުހުން އޭނާ ހައްޔަރުކޮށްފައިވެއެވެ.