މިއަދު ބޭއްވި ޕީއެންސީގެ އެތެރޭގެ އިންތިހާބުގައި ވާދަކޮށް އިންތިހާބު ކާމިޔާބުކުރި ކެންޑިޑޭޓުންނަށް ރައީސް ޑރ. މުޙައްމަދު މުޢިއްޒު މަރުހަބާ ވިދާޅުވެއްޖެއެވެ.

މިއަދު ބޭއްވި އިންތިހާބުގައި ވަނީ އެ ޕާޓީގެ ދާއިރާތަކުގެ ރައީސުންނާއި ނައިބު ރައީސުންނާއި ޒުވާނުންގެ ހަރަކާތުގެ ރައީސް އާއި އަންހެނުންގެ ހަރަކާތުގެ ރައީސްގެ އިތުރުން ސްޓިއަރިން ކޮމެޓީގެ މެމްބަރުން އިންތިހާބު ކޮށްފައެވެ.

އިންތިހާބު ނިންމާލުމާއެކު ރައީސް މިރޭ އެކްސްގައި ވަނީ، ކޮންގްރެސް ޕާޓީގެ އެތެރޭގެ އިންތިހާބު ކާމިޔާބު ކުރި ހުރިހާ ފަރާތްތަކަށް މަރުހަބާ ދަންނަވާފައެވެ.

އޭގެ އިތުރުން އިންތިހާބުގައި ވާދަކުރި ކެންޑިޑޭޓުންނާ އިންތިހާބުގެ އެކި ކަންކަމުގައި އުޅުނު ފަރާތްތަކުގެ އިތުރުން އިންތިހާބުގައި ވޯޓުލީ ފަރާތްތަކަށް ވެސް ރައީސް ވަނީ މަރުހަބާއާއި ޝުކުރު ދަންނަވާފައެވެ.

ޕީއެންސީން އާންމު ކޮށްފައިވާ ތަފާސް ހިސާބުތައް ދައްކާގޮތުން 1984 މަގާމަކަށް މި އިންތިހާބުގައި މީހުން އިންތިހާބު ކުރިއެވެ. އިންތިހާބުގައި 648 ކެންޑިޑޭޓުން ވާދަކޮށްފައިވެއެވެ. އަނެއް 1300 މަގާމަށް، އެންމެ ކެންޑިޑޭޓަކު ކުރިމަތިލައްވާފައިވާތީ، އެ 1300 މަގާމަށް ވަނީ، އިންތިހާބަކާ ނުލައި މީހުން ހޮވިފައެވެ.