ޕީއެންސީން މިއަދު ބޭއްވީ ރާއްޖޭގެ އެއްވެސް ސިޔާސީ ޕާޓީއަކުން ނުބާއްވާވަރުގެ ވަރުގަދަ އިންތިހާބެއް ކަމަށް އެޕާޓީގެ ޗެއާޕާސަން އަބުދުއްރަޙީމް ޢަބުދުﷲ ވިދާޅުވެއްޖެއެވެ.

ޕީއެންސީން މިއަދު ބޭއްވި އެތެރޭގެ އިންތިޚާބާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ، އެޕާޓީން ބޭއްވީ ރާއްޖޭގެ އެއްވެސް ސިޔާސީ ޕާޓީއަކުން ނުބާއްވާވަރުގެ ވަރުގަދަ އިންތިހާބު ކަމަށެވެ. އަދި ޕީއެންސީގެ އެތެރޭގެ އިންތިހާބު ނިމިގެންދިޔައީ ވަރަށް ކާމިޔާބު ކަމާއެކު ކަމަށް ޢަބުދުއްރަޙީމް ވިދާޅުވިއެވެ. އަބުދުއްރަޙީމް ވިދާޅުވީ އެތެރޭގެ އިންތިހާބުގައި ހިނގާފާނެ ކަމަށް ބެލެވުނު ކަންކަން މި އިންތިހާބުގައި ފެނިގެން ގޮސްފައިނުވާ ކަމަށެވެ.

"މިވަރުގެ އިންތިހާބެއް ނިމިގެންދާއިރު ހިނގާފާނެ ކަމަށް ލަފާކުރެވުނު ކަންތައްތަކެއް ނުހިގައޭ އަޅުގަނޑު ދަންނަވާނީ އުފަލާއެކީގައި މި އިންތިހާބު ކާމިޔާބު ކަމާއެކު ކުރިއަށް ގެންދިޔުމުގައި އެހީތެރިވި ހުރިހާ ބޭފުޅުންނަށް އަޅުގަނޑު ޝުކުރު ދަންނަވަން،" ޢަބުދުއްރަޙީމް ވިދާޅުވިއެވެ.

މީގެ އިތުރުން ޢަބުދުއްރަޙީމް ވިދާޅުވީ އެތެރޭގެ ބޮޑު އިންތިހާބެއް ނިމިގެންދާއިރު ޝަކުވާ އެއް ނެތި ނުދާނެ ކަމަށެވެ. އަދި އިންތިހާބާއި ގުޅިގެން މެމްބަރުންގެ މެދުގައި ހިތްހަމަނުޖެހުންތަކެއް ހުރުމަކީ އެކަށީގެންވާ ކަމެއް ކަމަށް ޢަބުދުއްރަޙީމް ވިދާޅުވިއެވެ.

"އެހެން އެ ވަނީވެސް މި އިންތިހާބަށް އެބޭފުޅުންގެ ހުރި ޝައުގުވެރިކަމެއްގެ ބޮޑުކަމުން، އެހެންވީމަ އެހުރިހާ ފަރާތްތަކަށް ވެސް އަޅުގަނޑު ވަރަށް ބޮޑަށް ޝުކުރު ދަންނަވަން،" ޢަބުދުއްރަޙީމް ވިދާޅުވިއެވެ.