ރާއްޖޭގެ ރައީސްކަމަށް ވާދަކުރެއްވުމުގެ ވިސްނުން ނުގެންގުޅުއްވާ ކަމަށް ވެރިކަންކުރާ ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިރޭ ވިދާޅުވެއްޖެއެވެ.

ޕީއެންސީން މިއަދު ބޭއްވި އެތެރޭގެ އިންތިޚާބާ ގުޅޭ ގޮތުން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް ވިދާޅުވީ، ރާއްޖޭގެ ވެރިކަމަށް ކުރިމަތިލުމުގެ ވިސްނުންފުޅެއް ނެތް ކަމަށެވެ. އަދި ކުރިއަށް އޮތްތާގައި ވެސް އެފަދަ ވިސްނުމެއް ނުގެންގުޅުއްވާނެ ކަމަށް ޢަބުދުއްރަޙީމް ވިދާޅުވިއެވެ.

"އަޅުގަނޑު ވާދައެއް ނުވެސް ކުރާނަން، ފުރުސަތެއް ލިބުނަސް އަޅުގަނޑު އެކަމުން ސަލާމަތްވާނަން،" އަބުދުއްރަޙީމް ވިދާޅުވިއެވެ. 

މީގެ އިތުރުން ޢަބުދުއްރަޙީމް ވިދާޅުވީ ޕީއެންސީގެ އަމާޒަކީ، ރާއްޖޭގައި މިހާރު އަމަލުކުރަމުން އަންނަ ގާނޫނު އަސާސީގެ ދަށުން ދެވަނަ ދައުރެއް ކާމިޔާބު ކުރައްވާ ފުރަތަމަ ރައީސްގެ ގޮތުގައި 2028 ވަނަ އަހަރު، ރައީސް ޑރ. މުޙައްމަދު މުއިއްޒު އިންތިޚާބު ކުރުން ކަމަށެވެ.

އަދި އެމަނިކުފާނު ދެވަނަ ދައުރަކަށް އިންތިހާބު ކުރުމުގައި ސާބިތުވެ ހުންނަވާނެ ކަމަށް ޢަބުދުއްރަޙީމް ވިދާޅުވިއެވެ. އަބުދުއްރަޙީމް ވިދާޅުވީ 2028 ގައި ޕީއެންސީގެ ރިޔާސީ ޕްރައިމަރީއެއް ނޯންނާނެ ކަމަށެވެ. އަދި 2028 ގައި އެޕާޓީގެ ރިޔާސީ ކެންޑިޑޭޓަކަށްވާނީ ރައީސް ޑރ. މުއިއްޒު ކަމަށް ޢަބުދުއްރަޙީމް ވިދާޅުވިއެވެެ.