ނިރުބަވެރި އިސްރާއީލުން ޣައްޒާގެ މިސްކިތެއް ކައިރިޔަށް ދިން ހަމަމާއެއްގައި 38 މީހުން މަރުވެއްޖެއެވެ.

ޣައްޒާގެ ސިއްހީ އޮފިޝަލުންނާ ހަވާލަދީ ބޭރުގެ ނޫސްތަކުން ރިޕޯޓްކުރާ ގޮތުގައި އިއްޔެ އިސްރާއީލުން ވަނީ ޣައްޒާގެ އެކި ސަރަހައްދުތަކަށް ވަރުގަދަ ހަމަލާތަކެއް ދީފައެވެ. މި ހަމަލާތައް އަމާޒުވެފައިވާ ބައެއް ސަރަހައްދުތަކުގެ ތެރޭގައި ކަމާލް އަދުވާން ހޮސްޕިޓަލާއި ނޫސެއިރާތުގެ އަލްފާރޫގު މިސްކިތް ހިމެނެއެވެ.

ފަހަކަށް އައިސް އިސްރާއީލުގެ ހަމަލާތައް ޣައްޒާގެ ސިއްހީ ދާއިރާގެ ތަންތަނަށް އަމާޒުވާކަން ފާހަގަ ކުރެވެއެވެ. އަދި މުސްލިމުން އާންމުކޮށް އެއްވާ ހިސާބުތަކަށް މި ހަމަލާތައް ތަކުރާރުކޮށް އަމާޒުވާކަމަށް މީގެ ކުރިންވެސް އޮފިޝަލުން ވަނީ މައުލޫމާތު ދީފައެވެ.

މެދުއިރުމަތީގެ ގައުމުތަކަށް އަރައި އިސްރާއީލުން ހިންގަމުންދާ ލާއިންސާނީ މި ޖަރީމާތަކުގައި ލުބުނާނަށް ވެސް ދަނީ ގެއްލުންތައް ވަމުންނެވެ. އެގޮތުން އެގައުމުގެ ވެރިރަށް ބެއިރޫތައް އިސްރާއީލުން އަރައި މީހުންގެ ދިރިއުޅުން އެއްކޮށް ފުނޑުފުނޑު ކުރަމުންދާކަމަށް މީޑިޔާ ރިޕޯޓްތައް ބުނެއެވެ.

ޣައްޒާގައި އިސްރާއީލުން ހިނގަމުންދާ ނަސްލު ނައްތާލުމުގައި އޮކްޓޯބަރު 7، 2023 އިން ފެށިގެން 44،176 ފަލަސްތީނު މީހުން މަރުވެ 104،473 މީހުން ވަނީ ޒަހަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި ގާތްގަނޑަކަށް 1،139 މީހުން މަރުވެފައިވާ ކަމަށް ލަފާކުރެވެ އެވެ.