ކޮޕް-29 ސަމިޓުން ބޭނުންވި ހުރިހާކަމެއް ހާސިލު ނުވިނަމަވެސް އެއީ އަދި ފެށުމެއްކަމަށް އެންވާރަމެންޓް މިނިސްޓަރު ތޯރިގު އިބްރާހީމް ވިދާޅުވެއްޖެއެވެ.

ކޮޕް-29 ސަމިޓާއި ގުޅޭގޮތުން ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން މިނިސްޓަރު ތޯރިގު ވިދާޅުވީ، މޫސުމަށް އަންނަ ބަދަލުތަކާއި ގުޅޭގޮތުން ހަރަދު ކުރުމަށް 1.3 ޓްރިލިއަން ޑޮލަރު ބޭނުންވާކަމަށް އެކަމުގެ މާހިރުން ތައްޔާރުކުރި ދިރާސާތަކުން ދައްކާ ކަމަށެވެ.

ނަމަވެސް، ސަމިޓުގައި ގައުމުތަކުން އެއްބަސްވީ މޫސުމާބެހޭ ކަންކަމަށް އަހަރަކު 300 ބިލިއަން ޑޮލަރު ފޯރުކޮށްދިނުމަށް ކަމަށް ތޯރިގުވަނީ ވިދާޅުވެފައެވެ. ތޯރިގު ވިދާޅުވީ ކުދި ގައުމުތަަކަށް ފޯރުކޮށްދޭން ނިންމި އެ އަދަދަކީ އަންދާޒާ ކުރިވަރަށްވުރެ ދަށް އަދަދެއްކަމަށެވެ.

އޭނާ ވިދާޅުވީ ގައުމުތަކުންް އެދުނު އަދަދަށް ފައިސާ ފޯރުކޮށްދޭން އެއްބަސް ނުވިނަަމަވެސް، ސަމިޓުގައި ރާއްޖެއިން ކުރީ ކާމިޔާބު މަސައްކަތްތަކެއް ކަމަށާއި މިއީ އަދި ފެށުމެއް ކަމަށެވެ.

މިފަަހަރުގެ ކޮޕް-29 ސަމިޓުގައި ރާއްޖެއިން ވަނީ މުހިންމު ބައްދަލުވުންތަކެއް ލީޑުކޮށްގެން ކުރިއަށް ގެންގޮސްފައެވެ. މިފަހަރުގެ ސަމިޓުގައި ވެސް ރާއްޖޭގެ ފަރާތުން މޫސުމަށް އަންނަ ބަދަލުތަކުގެ ސަބަބުން ރާއްޖެފަދަ ގައުމުތަކަށް އޮތް ނުރައްކަލުގެ ވާހަކަތައް ދުނިޔޭގެ ގައުމުތަކަށް ވަނީ ކިޔާދީފައެވެ.