ހުއްދަ ނެތި ފެމިލީ ކޯޓުގެ ޝަރީއަތުގެ މަޖިލީހުން ނުކުތް މީހަކު ތިން ދުވަހަށް ޖަލަށް ލައިފިއެވެ.

މި މައްސަލައިގައި ފެމިލީ ކޯޓުން މި ހުކުމްކޮށްފައި ވަނީ އަންހެނެއްގެ މައްޗަށެވެ.

އެގޮތުން އެ ކޯޓުގެ ފަނޑިޔާރު މައީޝާ ޔޫސުފް ސަމީރު ކުރި ހުކުމްގައި ވިދާޅުވެފައި ވަނީ ޝަރީއަތް ހިނގަމުން ދަނިކޮށް ފަނޑިޔާރުގެ ހުއްދަނެތި ޝަރީއަތުގެ މަޖިލީސް ދޫކޮށް ނުދެވޭނެ ކަމާއި ފިޔަވަޅު އެޅޭނެ ކަަމަށް އަންގާފައި ވަނިކޮށް، ފަނޑިޔާރުގެ ހުއްދަ ނެތި އެއަންހެންމީހާ ޝަރީއަތުގެ މަޖިލީހުން ނުކުމެގެން ގޮސްފައިވާ ކަމަށެވެ.

ހުކުމުގައި ފަނޑިޔާރު ވިދާޅުވީ އެ އަންހެންމީހާ ޝަރީއަތުގެ މަޖިލީހުން ނުކުމެ ކޯޓުގެ ރިސެޕްޝަންގެ ތެރެއިން، ލީގަލް އޮފިސަރު އިންނަ ކޮޓަރި ތެރެއަށް ވަދެ، އެތަނުން ކޯޓުގެ ލޮބީ ސަރަހައްދަށް ނުކުމެ، ކޯޓުގެ ހުއްދަ ނެތި ކޯޓުން ނުުކުމެގެން ގޮސްފައިވާ ކަމަށެވެ.

ފަނޑިޔާރު ވަނީ މި މައްސަލައާއި ގުޅިގެން ޝަރީއަތުގެ ނިޒާމާއި ޚިލާފުވެފައިވާތީ އާއި ކޯޓުގެ ހުރުމަތް ކަނޑާފައިވާތީ އެ އަންހެންމީހާގެ މައްޗަށް ތިން ދުވަހަށް ޖަލަށް ލުމަށް ހުކުމް ކޮށްފައެވެ.