ޗައިނާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ވާން ލިޖިން ސަފީރުކަމުގެ ދައުރުހަމަކުރައްވައި އެނބުރި ގައުމަށް ވަޑައިގަންނަވަން ނިންމަވައިފިއެވެ.

ދިވެހި ޚާރިޖިއްޔާއިން ނެރުނު ބަޔާނެއްގައި ބުނެފައިވަނީ ޗައިނާގެ ސަފީރު މިއަދު ފޮރިން މިނިސްޓަރު ޑރ. އަބްދުﷲ ޚަލީލުގެ އަރިހަށް ވަދާއީ ޒިޔާރަތެއް ކުރެއްވި ކަމަށެވެ. ނަމަވެސް ލިޖިން އެނބުރި ގައުމަށް ފުރާވަޑައިގަންނަވާ ތާރީޚެއް އަދި ސާފެއް ނުވެއެވެ.

ފޮރިން މިނިސްޓްރީ އިން ބުނީ މިއަދުގެ ބައްދަލުވުމުގައި، ވޭތުވެދިޔަ ތިން އަހަރުގެ ތެރޭ ރާއްޖެ-ޗައިނާ ގުޅުން އިތުރަށް ބަދަހިކުރުމަށް ސަފީރު ކުރެއްވި މަސައްކަތަށް މިނިސްޓަރު ޚަލީލު ޝުކުރުއަދާކުރެއްވި ކަމަށެވެ. އަދި ސަފީރުގެ ފަރާތުން ލިބުނު އެހީތެރިކަަމަށް ދިވެހި ސަރުކާރުގެ ނަމުގައި ޝުކުރު އަދާކުރެއްވި ކަމަށް ފޮރިން މިނިސްޓްރީން ބުނެއެވެ. މި ބައްދަލުވުމުގައި ލިޖިންވެސް ވަނީ އެކަމަނާގެ ސަފީރުކަމުގެ ދައުރުގައި ދިވެހިން އަދި ދިވެހި ސަރުކާރުން ދިން އެހީތެރިކަމާއި މެހުމާންދާރީއަށް ޝުކުރުއަދާކުރައްވާފައެވެ. އަދި، ކުރިއަށް އޮތްތަނުގައިވެސް ދެ ގައުމުގެ ގުޅުން ބަދަހިކުރުމަށް ގާތުން މަސައްކަތްކުރައްވާނެ ކަމަށް ލިޖިން ވިދާޅުވިއެވެ.

މިއަދުގެ ބައްދަލުވުމުގައި، ދެބޭފުޅުން އިތުރަށް ކުރެއްވި މަޝްވަރާގެ ތެރޭގައި ރައީސް ޑރ. މުހައްމަދު މުއިއްޒުގެ ސަރުކާރަށް މިވީ އަހަރެއްހާ ދުވަހުގެ ތެރޭގައި ފެށުނު އަދި ކުރިއަށްދާ މަޝްރޫއުތައް ފާހަގަކުރެއްވި ކަމަށްވެސް ފޮރިން މިނިސްޓްރީން ވަނީ ބުނެފައެވެ.