ނ. ފޮއްދޫ ބަނދަރު ހެދުމަށް މިއަހަރުގެ ބަޖެޓުގައި ޖަހާފައި އޮތީ އެންމެ 266 ހާސް ރުފިޔާ ކަމަށް ޢިމާރާތްކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.

ވަޒީރު މުއްޠަލިބު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ވެލިދޫ ދާއިރާގެ މެންބަރު މުޙައްމަދު އައްބާސް ކުރެއްވި ސުވާލަކަށް ޖަވާބު ދެއްވަމުންނެވެ.

އެގޮތުން ވަޒީރު ވިދާޅުވީ ފޮއްދޫ ބަނދަރު ހެދުމުގެ މަސައްކަތަކީ އެމްޓީސީސީ އަށް 03 ސެޕްޓެމްބަރ 2023 ގައި ޑިޒައިން އެންޑް ބިލްޑް އުސޫލުން 53.7 މިލިއަން ރުފިޔާއަށް 390 ދުވަހުގެ ތެރޭގައި ނިންމުމަށް ޙަވާލު ކޮށްފައިވާ މަސައްކަތެއް ކަމަށެވެ.

އަދި މި ބަނދަރުގެ މަޝްރޫޢު ކުރިއަށް ގެންދިއުމަށް އެމްޓީސީސީއަށް އެޑްވާންސް ޕޭމަންޓްވެސް ދީފައިނުވާ ކަމަށާއި ކުރީ ސަރުކާރުން ބަނދަރު ޑިޒައިން ކޮށްފައިވާ ގޮތާމެދު ރައްޔިތުންގެ ކަންބޮޑުވުންތަކެއް ހުރުމުން ޑިޒައިން ބަދަލުކޮށް މީގެ ކުރިންވެސް ބަނދަރުތައް ހަދަމުންދާ ގޮތަށް ޑިޒައިން ބަދަލު ކޮށްފައިވާ ކަމަށް ވަޒީރު ވިދާޅުވިއެވެ.

“2023 ވަނަ އަހަރު ބަނދަރު ހެދުމަށް ސޮއިކުރިއިރު ބަޖެޓުގައި ހިމަނާފައި އޮތީ 2.1 މިލިއަން ރުފިޔާ. 2024 ވަނަ އަހަރުގައި އަޅުގަނޑުމެންނަށް ދީފައި އޮތީ އެންމެ 266ހާސް ރުފިޔާ. މިއީ އެމްޓީސީސީއަށް އެޑްވާންސް ޕޭމަންޓްވެސް ނުދީ އޮތް މަޝްރޫޢެއް.” މިނިސްޓަރ މިއަދު މަޖިލީހުގައި ވިދާޅުވިއެވެ.

ވަޒީރު މިއަދު ވިދާޅުވީ މިހާރު ކުރިއަށްދަނީ މަޝްރޫޢުގެ އީއައިއޭ ހެދުމުގެ މަސައްކަތް ކަމަށެވެ.

އޭގެ އިތުރުން ވަޒީރު މިއަދު ވިދާޅުވީ ކުރީ ސަރުކާރުން ރިޔާސީ އިންތިޚާބުގެ ތެރޭގައި ފޮއްދޫ ބަނދަރުގެ ޑިޒައިނަށް ބަދަލު ގެންނާނެ ކަމަށް ބުނެ ރައްޔިތުންނަށް ވަޢުދުވީ ކަމަށާއި ނަމަވެސް އެކަމަށް އެޕްރޫވަލްވެސް ރަސްމީގޮތުން ދީފައި ނެތް ކަމަށެވެ.

ވަޒީރު މުއްޠަލިބު މަޖިލީހުގައި މިއަދު މިކަން ފާހަގަ ކުރަށްވާފައިވާއިރު މީގެ ކުރިންވެސް މުއްޠަލިބު ވިދާޅުވެފައިވަނީ މި ސަރުކާރުން ވެރިކަމާ ހަވާލުވިއިރު 39 ބިލިއަން ރުފިޔާގެ 322 މަޝްރޫއުގައި ސޮއިކޮށްފައި އޮތް ކަމަށެވެ. ނަމަވެސް ނިމިދިޔަ 19 ވަނަ މަޖިލީހުން ފާސް ކުރި މިއަހަރުގެ ބަޖެޓުގައި މި މަޝްރޫތައް ކުރިއަށް ގެންދިއުމަށް ހިމަނާފައިވަނީ އެންމެ 3.6 ބިލިއަން ރުފިޔާކަމަށް މުއްޠަލިބު އޭރުވެސް ވިދާޅުވެފައިވެއެވެ.