އަންނަ ޑިސެންބަރު މަހުގެ ތެރޭގައި އެކޯޕަރޭޝަންގައި ހަވާލުގައި 800 އަށް ވުރެ ގިނަ މީހުން އުމްރާ އަށް ދާނެ ކަމަށް ހައްޖު ކޯޕަރޭޝަނުން ބުނެފިއެވެ.

ދައުލަތުގެ މީޑިޔާ، ޕީއެސްއެމްގައި ވާހަަކަ ދައްކަވަމުން ހައްޖު ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރު އަލީ ޝަރީފް ވިދާޅުވީ އެކޯޕަރޭޝަން އުފެދުނު ފަހުން މިވޭތުވެ 11 އަހަރު ތެރޭގައި އެންމެ ގިނަ މީހުން އުމްރާ އަށް ގެންދަނީ އަންނަ ޑިސެންބަރު ކަމަށެވެ. އެގޮތުން އަންނަ ޑިސެންބަރު ގާތްގަނޑަކަށް 800 މީހުން އެކޯޕަރޭޝަންގެ ހަވާލުގައި އުމްރާ އަށްދާނެ ކަމަށް ޝަރީފް ވިދާޅުވިއެވެ. އޭނާ ވިދާޅުވީ އަދިވެސް އިތުރު ފަރާތްތަކުން އުމްރާ އަށް ދާން އެދެމުންދާކަމަށް ޝަރީފު ވިދާޅުވިއެވެ.

"މިޑިސެންބަރުގެ އުމްރާ އަކީ ހައްޖު ކޯޕަރޭޝަންގެ މުޅި ހަޔާތުގައި ވެސް އެންމެ ފުރިހަމަ އެންމެ ގިނަ މީހުންނާއެކު ހައްޖު ކޯޕަރޭޝަން ދަތުރުކުރާ އުމްރާއެއް، ގާތްގަނޑަކަށް 800 އެއްހާ މީހުން ގޮވައިގެން އަޅުގަނޑުމެން އުމްރާ ކުރަން މިދަނީ ޑިސެންބަރު އުމްރާގައި،" ޝަރީފް ވިދާޅުވިއެވެ.

މީގެ އިތުރުން ހައްޖު ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރު އަލީ ޝަރީފް ވިދާޅުވީ އެހާ ގިނަ އަދަދެއްގެ ބަޔަކު އެކޯޕަރޭޝަންގެ ހަވާލުގައި އުމްރާ އަށް ދިޔުމަކީ ރައްޔިތުން އެކޯޕަރޭޝަން ބަލައިގަތް ކަމުގެ ހެއްކެއް ކަމަށެވެ. ހައްޖު ކޯޕަރޭޝަންގެ ދޭ ޚިދުމަތްތަށް މިހާރަށް ވުރެ ރަނގަޅު ކުރުމަށް ރައީސް މުޢިއްޒު ވަރަށް ބޮޑު އިސްކަމެއް ދެއްވާ ކަމަށް ޝަރީފް ވިދާޅުވިއެވެ.

ރާއްޖެއިން ގިނަ ބަޔަކު އުމްރާއަށް އެކި ދުވަސްވަރުގެ މަތިން ދެއެވެ. އޭގެ ތެރޭގައި ސްކޫލު ޗުއްޓީ ދުވަސްވަރު ހިމެނެއެވެ.