މީހެއްގެ ވައިބާ ހެކްކޮށްގެން ބައެއްގެ އަތުން ފައިސާ ހޯދުމުގައި ފުލުހެއްގެ ބައިވެރިވުމެއް ނުވަތަ ފުލުހަކަށް ތުހުމަތު ކުރެވިދާނެ ފަދަ އެއްވެސް ކަމެއް ފާހަގަކުރެވިފައި ނުވާ ކަމަށް ފުލުހުންގެ ޚިދުމަތުން މިރޭ ބުނެފި އެވެ.

ފުލުހުންގެ ޚިދުމަތުން މިރޭ ނެރުނު ބަޔާނެއްގައި ބުނެފައިވަނީ މީހެއްގެ ވައިބާ ހެކްކޮށް، އެ ވައިބާ އެކައުންޓު މެދުވެރިކޮށް އެކި މީހުންނަށް މެސެޖުކޮށްގެން ފައިސާ ހޯދި މައްސަލައާ ގުޅުންހުރި ތިން މައްސަލައެއް ތަހުގީގު ކުރަމުންދާ ކަމަށެވެ. އެ ސްކޭމްގައި ޖެހި، ފައިސާ ފޮނުވި ތިން މީހުން ފައިސާ ޖަމާކުރި އެއް އެކައުންޓަކީ ފުލުހެއްގެ އަންބެއްގެ އެކައުންޓުކަން ފުލުހުންގެ ބަޔާނުގައި ބުނެފައިވެއެވެ. އެހެން ނަމަވެސް، އެ އެކައުންޓަކީ އެހެން ބައެއްގެ ބާރުގެ ދަށަށް ގެންގޮސްފައިވާ އެކައުންޓެއް ކަމަށް ފުލުހުން ނެރުނު ބަޔާނުގައިވެެއެވެެ.

"އެ އެކައުންޓަކީ އެ އަންހެން މީހާގެ އީމެއިލް އާއި ބޭންކު އެކައުންޓު ކޮންޕްރޮމައިޒް ކޮށްގެން އެހެން ބައެއްގެ ބާރުގެ ދަށަށް ގެންގޮސްފައިވާ އެކައުންޓެއްކަން ވަނީ ފާހަގަކުރެވިފަ އެވެ." ފުލުހުންގެ ބަޔާނުގައި ބުނެފައިވެއެވެ.

ފުލުހުންގެ ބަޔާނުގައި އިތުރަށް ބުނެފައިވަނީ އެ މުއައްސަސާގެ އިކޮނޮމިކް ކްރައިމް ޑިޕާޓުމެންޓުން ދަނީ އެ މައްސަލަ ތަހުގީގު ކުރަމުން ކަމަށެވެ. އަދި ތަހުގީގުގެ އެއްވެސް ހިސާބަކުން، އެ މައްސަލައިގައި ފުލުހެއްގެ އެއްވެސް ބައިވެރިވުމެއް އޮތްކަން ފާހަގަކުރެވިއްޖެ ނަމަ އެ ފުލުހެއްގެ މައްސަލަ ބަލާނެ ކަމަށް އެ ބަޔާނުގައި ބުނެފައިވެެއެވެ.

ފުލުހުން ބުނީ އޮޅުވާލައިގެން އެ ތިން މީހުން ލައްވައި ޓްރާންސްފާ ކުރުވި ފައިސާގެ ތެރެއިން 5600 ރުފިޔާ ދައުރުވެފައިވާ އެކައުންޓުތަކުގެ ތެރެއިން އެއް އެކައުންޓު މިހާރު ހިފަހައްޓާފައިވާ ކަމަށެެވެ. އަދި މި މައްސަލައިގައި މަކަރާއި ހީލަތުން ހޯދާފައިވާ ފައިސާގެ ތެރެއިން ރިކަވާ ނުކުރެވިވާ ފައިސާ ރިކަވާ ކުރުމުގެ މަސައްކަތް ތަހުގީގުގެ ތެރެއިން ކުރަމުންދާކަމަށް ފުލުހުން ބުންޏެވެ.

ފުލުހުން ވަނީ އެ މުއައްސަސާގެ ނަން ކިލަނބުވާ ގޮތަށް މައުލޫމާތު ނުފެތުރުމަށް އިލްތިމާސް ކޮށްފައެވެ. އަދި އެކަމާ މެދު ކަންބޮޑުވާ ކަމަށް ފުލުހުން ވަނީ ބުނެފައެވެ.