"ގާނޫނުއަސާސީގެ ދިފާއުގައި ރައްޔިތުންގެ" ނަމުގައި އަންނަ ޑިސެމްބަރު 10، ގައި އިދިކޮޅު އެމްޑީޕީން ބޮޑު ޖަލްސާއެއް ބާއްވަން ނިންމައިފިއެވެ.

އިންސާނީ ހައްގުތަކުގެ ދުވަހާއި ގައުމީ މަސްވެރިންގެ ދުވަސް ވެސް ފާހަގަކުރާ ޑިސެމްބަރު 10، ގައި މި ޖަލްސާ އޮންނާނެކަން ހާމަކުރެއްވީ އެމްޑީޕީގެ ހަރުގޭގައި ރޭ ބޭއްވި ޖަލްސާއެއްގައި އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) އެވެ. މި ޖަލްސާ ބާއްވާ ގޮތަށް ހަމަޖެހިފައިވަނީ އަލިމަސް ކާނިވާ ސަރަހައްދުގަ އެވެ.

ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅުވީ މި ޖަލްސާއަކީ ގިނަ ބައެއްގެ މަސައްކަތުން ހޯދި ޑިމޮކްރަސީ އާއި އިންސާނީ ހައްގުތައް މި ސަރުކާރުން ނިގުޅައިގަންނަމުން ދާތީ އެކަމާ ދެކޮޅަށް އަޑުއުފުލަން ބާއްވާ ޖަލްސާއެއް ކަމަށެވެ.

އެމްޑީޕީގެ ޕީޖީ ގްރޫޕުގެ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ ރާއްޖޭގެ ހުރިހާ ރައްޔިތުންނަށް މި ޖަލްސާއަށް ދައުވަތުދޭ ކަމަށެވެ. ހާއްސަކޮށް މަސްވެރިންނާއި ރިސޯޓުތަކުގައި މަސައްކަތްކުރާ މުވައްޒަފުން އެ ޖަލްސާގައި ބައިވެރިވުމަށް ނާޒިލް ވަނީ އެދިވަޑައިގެންފައެވެ.

އޭނާ ވިދާޅުވީ ރައްޔިތުން ސަރުކާރާއި ދެކޮޅަށް ނުކުތުމުން ރައީސުލްޖުމްހޫރިއްޔާއަށް ރައްޔިތުންގެ އަޑު އައްސަވަން މަޖުބޫރުވާނެކަމަށެވެ.

މިއީ މިދިޔަ އަހަރު ސެޕްޓެމްބަރު މަހު ބޭއްވި ރިޔާސީ އިންތިހާބަށްފަހު އެމްޑީޕީން ކާނިވަލުގައި ބާއްވާ ފުރަތަމަ ޖަލްސާ ކަން ވެސް ފާހަގަކުރެވެއެވެ.