ގާނޫނު އަސާސީގެ ދިފާޢުގައި ކަމަށް ބުނެ ގައުމު ހަލަބޮލިކުރުމުގެ ފުރުސަތު އެމްޑީޕީއަށް ނުދެއްވާނެ ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެެ.

އަންނަ ޑިސެންބަރު މަހުގެ 10 ވަނަ ދުވަހު ޤާނޫނު އަސާސީގެ ދިފާޢުގައި، ނަމުގައި އެމްޑީޕީން ވަނީ ބޮޑު އެއްވުމެއް ބާއްވަން ނިންމާފައެެވެ. އެކަމާ ގުޅިގެން ޕީއެންސީގެ ޕާލިމެންޓްރީ ގުރޫޕްގެ ޑެޕިއުޓީ ލީޑަރު އިބްރާހިމް ޝުޖާއު ވިދާޅުވީ އެމްޑީޕީއިން ގާނޫނު އަސާސީއޭ ކިޔައިގެން އުޅެނީ ޤައުމުހަލަބޮލި ކުރަންކަމަށެވެ.

އަދި މީގެ ކުރިން އެމްޑީޕީން އުޅުނު ގޮތަށް އަލިފާން ބޯޅަ އުކައި، މިރުސް ފެން ފުލުހުންގެ މޫނަށް ޖަހައި، ދައުލަތުގެ އިމާރާތްތަކުގައި ހުޅުޖެހި ޒަމާން އިޔާދަ ކުރަން މަސައްކަތް ކުރަން އުޅުނު ނަމަވެސް އެކަން ކުރުމުގެ ފުރުސަތު ނުދެއްވާނެ ކަމަށް ޝުޖާޢު ވިދާޅުވިއެވެ.

ބުނަން ވާހަކައެއް @MDPSecretariat. ޤާނޫނު އަސާސީއޭ ކިޔާ ތިއުޅެނީ ޤައުމު ހަލަބޮލި ކުރަން.ކުރިން އުޅުނު ގޮތައް އަލިފާން ބޯޅަ އުކައި،މިރުސް ފެން ފުލުހުންގެ މޫނަށް ޖަހައި،ދައުލަތުގެ އިމާރާތްތަކުގަ ހުޅުޖެހި ޒަމާން އިޔާދަ ކުރަން ނޫޅުއްވާ!އެކަމެން ދެން އިންޝާالله ނުވާނެ.1/2

— Ibrahim Shujau (@IbrahimShujaau) November 28, 2024

ޝުޖާޢު ވިދާޅުވިގޮތުގައި ޤާނޫނު އަސާސީ އާއި ހިލާފަށް ސަރުކާރުން ކަމެއް ކޮށްފައި އޮތްނަމަ ދާންޖެހޭނީ ކޯޓަށެވެ.

މީގެ އިތުރުން ޝުޖާއު ވިދާޅުވީ އެމްޑީޕިއިން މަގުމަތީގައި ކޯޓު ހަދައިގެން އުޅުނު ޒަމާން މާޒީވެ ގޮސްފިކަމަށެވެ. އަދި ގައުމަށް ބިލިއަން ޑޮލަރުގެ މަޝްރޫއުތައް އަންނަން ފެށި ވަގުތު މަގުމަތި ހަލަބޮލިކޮށް އެ ފުރުސަތުން ދިވެހީން މަހުރޫމު ކުރިގޮތަށް ދެން އެކަމެއް ނުވާނެ ކަމަށް ޝުޖާޢު ވިދާޅުވިއެވެ.

އިދިކޮޅު އެމްޑީޕީން ”ޤާނޫނު އަސާސީގެ ދިފާއުގައި ރައްޔިތުން“ގެ ނަމުގައި ބާއްވާ މި ޖަލްސާ އޮންނާނީ އަންނަ މަހުގެ 10 ވަނަ ދުވަހު މާލޭގެ ކާނިވާ ސަރަހައްދުގައެވެ.

އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅުވެފައިވަނީ މި ޖަލްސާއަކީ ގިނަ ބައެއްގެ މަސައްކަތުން ހޯދި ޑިމޮކްރަސީ އާއި އިންސާނީ ހައްގުތައް މި ސަރުކާރުން ނިގުޅައިގަންނަމުން ދާތީ އެކަމާ ދެކޮޅަށް އަޑުއުފުލަން ބާއްވާ ޖަލްސާއެއް ކަމަށެވެ.