މި ދައުރުގެ ތެރޭގައި ޒަމާނީ ފެންވަރުގެ އިތުރު ސިނަމާއެއް ތަރައްގީކޮށް ނިންމައިދޭނެކަމަށް ޒުވާނުންނާބެހޭ މިނސްޓަރު އިބްރާހީމް ވަހީދު (އަސްވާޑު) ވިދާޅުވެއްޖެއެވެ.

ސަރުކާރަށް 1 އަހަރު ފުރުމާއި ގުޅިގެން ޕީއެސްއެމުން ގެނެސްދިން ޕްރޮގްރާމެއްގައި ވާހަކަ ދައްކަވަމުން މިނިސްޓަރު ވިދާޅުވީ، ރާއްޖޭގައި ފިލްމު އިންޑަސްޓްރީގައި މަސައްކަތްކުރާ ފަރާތްތަކަށް އޮތް އެންމެބޮޑު އެއް ގޮންޖެހުމަކީ ފިލްމު އަޅުވާނެ އެންމެ ތަނެއް ހުރުންކަމަށެވެ.

އެގޮތުން ބައިވަރު ޕްރޮޑިއުސަރުން ތިބިއިރު އެ ފަރާތްތަކުން ތިބެންޖެހެނީ އެއްބައެއްގެ ފިލްމު އަޅުވާ ނިމެންދެން ކިއުގައި ކަމަށާއި އެކަމަށް ހައްލެއް ހޯދައިދިނުމަކީ މި ސަރުކާރުން ކުރާނެކަމެއް ކަމަށެވެ.

މިނިސްޓަރު ވިދާޅުވީ އޮލީމްޕަސް ފަދަ ތަނެއް ޒަމާނީ ފެންވަރުގައި ތަރައްގީކޮށް މި ސަރުކާރުގެ ފަސް އަހަރު ދުވަހުގެ ތެރޭގައި ނިންމައިދެއްވާނެ ކަމަށެވެ.

އޭގެ އިތުރުން އާޓިސްޓުންނަށް ކަންކަން ފަހިކޮށްދިނުމަށް 25 މިލިއަން ރުފިޔާގެ ބަޖެޓެއް އަންނަ އަހަރު ތައްޔާރު ކުރައްވާނެކަމަށާއި ޒަމާނީ ފެންވަރުގެ އާޓު ގެލެރީއެއް ވެސް ތަރައްގީ ކޮށްދެއްވާނެކަމަށް މިނިސްޓަރު ވިދާޅުވިއެވެ.

އަދި ރާއްޖޭގެ ހަތް ސަރަހައްދެއްގައި ޒަމާނީ ފެންވަރުގެ 7 ލައިބްރަރީ ގާއިމުކުރަން ވެސް ނިންމާފައިވާކަމަށް މިނިސްޓަރު ވިދާޅުވިއެވެ.

މި ސަރުކާރަށް 1 އަހަރު ފުރިފައިވާއިރު ޒުވާނުންނާބެހޭ މިނިސްޓްރީން ވެސް ވަނީ ފާހަގަކޮށްލެވޭ ގިނަ މަސައްކަތްތަކެއް ކޮށްފައެވެ.