ފުލުހުންގެ ހިދުމަތުގެ އިތުބާރު ދެމެހެއްޓުމަށްޓަކައި އުސޫލުތަކާއި ހިލާފަށް އެ އިދާރާގައި މަސައްކަތް ކުރާ ގިނަ އަދަދެއްގެ ފުލުހުންނަށް ފިޔަވަޅު އަޅާފައިވާނޭކަމަށް ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވެއްޖެއެވެ.

ސަރުކާރަށް 1 އަހަރު ފުރުމާއި ގުޅިގެން ޕީއެސްއެމުން ގެނެސްދިން ޕްރޮގްރާމެއްގައި އިއްޔެ ވާހަކަ ދައްކަވަމުން ސީޕީ ޝުޖާއު ވިދާޅުވީ، ފުލުހުންގެ ހިދުމަތުން ފޯރުކޮށްދޭ ހިދުމަތަކީ ރައްޔިތުންގެ އިތުބާރު ލިބިފައިވާ ހިދުމަތަކަށް ހެދުމަށާއި އެ ހިދުމަތުގައި މަސައްކަތްކުރާ ފުލުހުންނަކީ ވެސް އިތުބާރުހިފޭ ނަޒާހާތްތެރި ބަޔަކަށް ހެދުމަށް ގިނަ މަސައްކަތްތަކެއް ކުރެވެމުން ދާކަމަށެވެ.

އެގޮތުން، ފާއިތުވި 1 އަހަރުގެ މުއްދަތުގައި ފުލުހުންނަކީ މަސައްކަތާއި ގުޅޭ ތަމްރީނުތައް ލިބިފައިވާ ބަޔަކަށް ހެދުމަށް އެކި ޕްރޮގްރާމްތައް ކުރިއަށް ގެންދެވިފައިވާކަމަށާއި އަދި ކުރިއަށް އޮތް އަހަރުތަކުގައި ވެސް އެފަދަ ޕްރޮގްރާމްތައް ފުލުހުންނަށް ފޯރުކޮށްދޭނެ ކަމަށް ވިދާޅުވިއެވެ.

އަދި ފުލުހުންގެ ހިދުމަތުގެ ގާނޫނު ބިނާވެގެންވަނީ ސިޔާސީ އަދި އެ ނޫންވެސް ނުފޫޒުތައް ނުފޯރުވޭގޮތަށް އެ ކަންކަމުން އެއްކިބާވެގެންތިބެ ހިދުމަތް ދެވޭގޮތަށް ކަމަށާއި އެއާއި ހިލާފަށް މަސައްކަތް ކުރާނަމަ އެ ފުލުހަކު އެ މަސައްކަތް ކުރަނީ ފުލުހުންގެ ގާނޫނާއި ހިލާފަށްކަމަށް ސީޕީ ވިދާޅުވިއެވެ.

ސީޕީ ފާހަގަ ކުރެއްވިގޮތުގައި އެފަދަ މައްސަލަތަކުގައި މިދިޔަ އަހަރު ވެސް 50 އަށްވުރެ ގިނަ ފުލުހުންނަށް ފިޔަވަޅު އަޅާފައިވެއެވެ. އަދި އޭގެ ތެރެއިން 20 ފުލުހަކު ވަޒީފާއިން ވަކިކޮށްފައިވާނޭކަމަށް ވެސް ސީޕީ ޝުޖާއު ވިދާޅުވިއެވެ.

އަދި ފުލުހުންގެ މަސައްކަތަކީ ޕްރޮފެޝަނަލް މަސައްކަތަކަށް ހަދައި އެގޮތުގައި ދެމެހެއްޓުމަށް ހުރިހާ ފުލުހުން ވެސް މަސައްކަތް ކުރަމުންދިޔުމަށާއި ރައްޔިތުންނަށް ދޭންޖެހޭ ހިދުމަތްތައް ދިނުމުގައި އެއްވެސް ބައެއްގެ ނުފޫޒަކަށް ނުލެނބޭ ބަޔަކަށް ފުލުހުން ހަދައިދިނުމަށް މަސައްކަތްތަކެއް ކުރައްވާނެކަމަށް ވިދާޅުވިއެވެ.