ދިވެހި ގައުމިއްޔަތާއި ގުޅޭ ދިރާސާތައްކޮށް މަޝްވަރާތައް ކުރިއަށް ގެންދިޔުމަށް ގައުމިއްޔަތު ކޮލެޖުން ކުރިއަށް ގެންދާ “ކަޅުއޮއްފުންމި – ދިވެހި ގައުމިއްޔަތު” ދަރުބާރު ފަށައިފިއެވެ.

މި ދަރުބާރު ފައްޓަވައިދެއްވީ ނާއިބު ރައީސް ޙުސައިން މުޙައްމަދު ލަތީފެވެ.

ދިވެހި ގައުމިއްޔަތާއި ގުޅުންހުރި އެކި ދާއިރާތަކުގައި ގިނަ މަސައްކަތްތަކެއް ކުރައްވާފައިވާ އަދި ކުރައްވަމުން ގެންދަވާ ގިނަ ބޭފުޅުންތަކެއް ބައިވެރިވާ މި ދަރުބާރުގައި ޖުމުލަ ނުވަ ދިރާސާ ކަރުދާހެއް ހުށަހަޅަންވަނީ ހަމަޖެހިފައެވެ.

އޭގެ ތެރޭގައި އެންމެ މުހިންމުކޮށް ފާހަގަކޮށްލެވޭ ބައެއް ކަރުދާސްތަކަށް ބަލާއިރު، ދިވެހިބަހާއި ގުޅޭ ކަރުދާހަކާއި، ރާއްޖޭގައި އިސްލާމްދީން ފެތުރުނު ގޮތާއި ގުޅޭ ކަރުދާހަކާއި އަދި ރާއްޖެ އުފެދިފައިވާ ގޮތާއި ގުޅޭ ކަރުދާހެއް ހިމެނެއެވެ.

މި ދަރުބާރު ފައްޓަވައިދެއްވަމުން ނާއިބު ރައީސް ޙުސައިން މުޙައްމަދު ލަތީފް ދެއްކެވި ވާހަކަފުޅުގައި ވިދާޅުވީ، ރާއްޖޭގައި މިފަދަ ދަރުބާރެއް މީގެ ކުރިން ބޭއްވިފައި ނުވާކަމަށާއި އެހެންކަމުން މިއީ ދިވެހީންގެ ގައުމިއްޔަތާއި އަމިއްލަވަންތަކަން ރައްކާތެރި ކުރުމަށާއި އެކަމަށް ހޭލުންތެރިކަން އިތުރު ކުރުމަށް ކުރިއަށް އެޅޭ ވަރަށް ހަރުދަނާ އަދި އީޖާބީ ފިޔަވަޅެއްކަމަށް ވެގެން ދާނެކަމަށް ގަބޫލުފުޅު ކުރައްވާކަމަށެވެ.

ގައުމިއްޔަތަށް އިސްކަމެއް ދީގެން މި ސަރުކާރުން މިފަދަ ގިނަ ހަރަކާތްތަކެއް ހިންގަމުންދާއިރު، ދާދިފަހުން ރައީސް ވަނީ ދިވެހި ގައުމިއްޔަތު ކޮލެޖު އިފްތިތާހު ކޮށްދެއްވާފައެވެ. އަދި އަދި މި މަހުގެ 17 ގައި ވަނީ އެ ކޮލެޖުގެ އޮފީސް ރައީސްގެ އަނބިކަނބަލުން ހުޅުއްވައިދެއްވާފައެވެ.

އެ ކޮލެޖުން ބުނާގޮތުގައި ކުރިއަށްއޮތް ދުވަސްތަކުގައި ވެސް މިފަދަ ގިނަ ޕްރޮގްރާމްތަކެއް އެ ކޮލެޖާއި ގައުމިއްޔަތު މިނިސްޓްރީ ގުޅިގެން ކުރިއަށް ގެންދަވާނެ ކަމަށެވެ.