ފަތުރުވެރިކަމާ ބެހޭ ވުޒާރާއިން ދެމުން އަންނަ ”މޯލްޑިވްސް ޓޫރިޒަމް އެވޯޑްސް“ ގެ ތިންވަނަ އެޑިޝަނަށް ކުރިމަތިލުމުގެ ފުރުސަތު އަނެއްކާވެސް އިތުރުކޮށްފިއެވެ.

މޯލްޑިވްސް ޓޫރިޒަމް އެވޯޑްސް (އެމްޓީއޭ) އަކީ ފަތުރުވެރިކަމާ ބެހޭ ވުޒާރާއިން 2022 ވަނަ އަހަރު ތައާރަފްކުރި އަހަރީ ގައުމީ އެވޯޑެކެވެ.

މި އެވޯޑަށް ނަން ހުށަހަޅަން ދިން މުއްދަތު އެންމެ ފުރަތަމަ ހަމަވީ މިދިޔަ މަހުގެ 14 އަށެވެ. އޭގެ ފަހުން އެ މުއްދަތު މި މަހުގެ 28 އަށް އިތުރުކުރިއެވެ.

ޓޫރިޒަމް މިނިސްޓްރީން ބުނީ މިހާރު އެވޯޑަށް ނަން ހުށަހެޅުމުގެ ފުރުސަތު އަންނަ މަހުގެ ހަތްވަނަ ދުވަހާ ހަމަށް އޮންނާނެ ކަމަށެވެ.

މިނިސްޓްރީން ބުނީ މި އެވޯޑަށް ކުރިމަތިލާން ހުޅުވާލާފައި ވަނީ ރިސޯޓުތަކާއި، ހޮޓާތަކާއި، ގެސްޓުހައުސްތަކާއި، ސަފާރީތަކާއި، ޓްރެވެލް އެޖެންސީތަކަށެވެ. އެގޮތުން ފަސް ކެޓަގަރީއަކުން 23 އެވޯޑެއް ދޭން ހަމަޖެހިފައިވެއެވެ. އެވޯޑަށް އެޕްލިކޭޝަން ހުށަހަޅަން ޖެހެނީ އޮންލައިންކޮށެވެ.

އެވޯޑު ދިނުމުގައި ބަލާނީ ޖޫން 1، 2023 އިން މެއި 31، މެއި 2024 ގެ ނިޔަލަށްކޮށްފައިވާ މަސައްކަތްތަކަށެވެ.

ރާއްޖޭގެ ޓޫރިޒަމަށް 50 އަހަރުވުމާ ގުޅިގެން 2022 ގައި ތައާރަފުކުރި މޯލްޑިވްސް ޓޫރިޒަމް އެވޯޑް މިދިޔަ އަހަރު ފަސް ދާއިރާއަކުން 59 އެވޯޑަކަށް ހުޅުވާލިއެވެ. އަދި އެކި ކެޓަގަރީތަކުން 88 ފަރާތަކުން 225 އެޕްލިކޭޝަން ލިބުނު އިރު، 31 ފަރާތަކަށް އެވޯޑު ދީފައިވެއެވެ.