13000 ހައުސިން ޔުނިޓް އެޅުމަށް ފައިނޭންސް ހޯދުމުގެ މަސައްކަތް ކުރަމުންދާކަމަށް ފަހި ދިރިއުޅުން ކޯޕަރޭޝަން (އެފްޑީސީ) ގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވެއްޖެއެވެ.

ޓީވީ ޕޮރުގުރާމެއްގައި ރޭ ވާހަކަ ދައްކަވަމުން ފަހި ދިރިއުޅުން ކޯޕަރޭޝަން (އެފްޑީސީ)ގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ، ހައުސިން ޔުނިޓްތައް އެޅުމަށް ބޭރުގެ ތިން ކުންފުންޏަކާއި އެކު އެކޯޕަރޭޝަނުން އެގްރިމެންޓްގައި ސޮއިކޮށްފައިވާ ކަމަށެވެ. އެގޮތުން ފުރަތަމަަ އެގްރިމެންޓްގެ ދަށުން 3000 ހައުސިން ޔުނިޓް އަޅާގޮތަށް ހަމަޖެހިފައިވާ ކަމަށް ހަމްދާން ވިދާޅުވިއެވެ. އޭނާ ވިދާޅުވީ މިމަހު ސޮއިކުރި އަނެއް ދެ އެގްރިމެންޓްގެ ދަށުން 10000 ހައުސިން ޔުނިޓް އެޅުމަށް ނިންމާފައިވާ ކަމަށެވެ. އަދި އެހައުސިން ޕްރޮޖެކްޓްތައް އަންނަ އަހަރުގެ ފުރަތަމަ ތިން މަސް ތެރޭގައި ފެށިގެންދާނެ ކަމަށް ހަމްދާން ވިދާޅުވިއެވެ.

"އެ ތިން ކުންފުންޏާއި އެކީވެސް އަޅުގަނޑުމެން މިހާރު މި ދަނީ މަސައްކަތް ކުރަމުން، ފައިނޭންޝަލް އެކުއަމަންޓްތައް ބަލައި އެ ބޭފުޅުން ފައިނޭންސިން ހަމަޖެއްސުމުގެ މަސައްކަތް ކުރަމުން މިދަނީ، އަދި ފައިނޭންސިން ހަމަޖެހުނުހާ އަވަހަކަށް އަޅުގަނޑު އިތުރު ތަފްސީލުތައް ފޯރުކޮށްދޭނަން،" ހަމްދާން ވިދާޅުވިއެވެ.