ޕްރޮޓީން އަކީ އަޅުގަނޑުމެންގެ އިސްތަށިގަނޑު ވަރުގަދަވެ ރީތިވުމުގައި ވަރަށް ބޮޑު ރޯލެއް އަދާކުރާ މާއްދާއެކެވެ. އަޅުގަނޑުމެންގެ އިސްތަށިތައް އުފެދިފައިވަނީ ކެރެޓިން ނަމަަކަށް ކިޔާ ޕްރޮޓީން އަކުންނެވެ. އެހެންކަމުން ވަކި ކަހަލަ ޕްރޮޓީން އެއް ބޭނުން ކުރުމުން އިސްތަށިގަނޑު ދިގުވާގޮތް އަވަސްވެ، އިސްތަށިގަނޑު ވަރުގަދަވެ ރީތިވެސް ވެއެވެ.

ޕްރޮޓީން ހިމެނޭ މާއްދާތައް ކެއުމުގައި ހިމެނުމުން މީހާގެ އިސްތަށިގަނޑު ވަރުގަދަވެ އިސްތަށި ފޭބުން ވެސް ހުއްޓުވައިދެއެވެ. ތިރީގައި މި ހިމަނާލަނީ އިސްތަށިގަނޑު ވަރުގަދަ ކުރަން ބޭނުންވާނަމަ ކެއުމުގައި ހިމެނުން އެންމެ ރަނގަޅު 2 ޕްރޮޓީންގެ ބާވަތެވެ.

ބިސް

ބިހަކީ އިސްތަށިގަނޑު ވަރުގަދަ ކުރުމުގައި އެންމެ ބޮޑަށް އެހީވެދޭ އެއް ޕްރޮޓީން އެކުލެވޭ ބާވަތެވެ. މިއީ ގިނަ އަދަދަކަށް ބައޮޓިން އެކުލެވޭ އެއްޗެކެވެ. ބައޮޓިން އަކީ ހަށިގަނޑުގައި ކެރެޓިން އުފައްދައި ދިނުމަށް އެހީވެދޭ މާއްދާއެވެ. މީގެ އިތުރުން ބިހަކީ އޭގައި ޕްރޮޓީންގެ އިތުރުން ގިނަ އަދަދަކަށް ނިއުޓްރިއެންޓު ހިމެނޭ އެއްޗެއް ވެސް މެއެވެ. އޭގެ ތެރޭގައި ޒިންކު، އަޔަން އަދި ބީ ވިޓަމިން ތައް ހިމެނެއެވެ. މި ހުރިހާ މާއްދާތަކަކީވެސް އިސްތަށިގަނޑު ހެދިބޮޑުވުމަށްޓަކައި ބޭނުންވާ މާއްދާތަކެވެ. ކެއުމުގައި ބިސް ހިމެނުމުން އިސްތަށީގެ ފޮލިކަލްތައް ވަރުގަދަވެ، އިސްތަށި ފެޅުން އިތުރުވެ، މީހާގެ އިސްތަށިގަނޑުވެސް ވަރުގަދަ ވެއެވެ.

ކުކުޅު

ކުކުޅަކީވެސް އޭގައި ގިނަ އަދަދަކަށް ޕްރޮޓީން ހިމެނޭ އެއްޗަކަށްވީއިރު، މި ކެއުމުން ކެރެޓިން އުފެދުމަށް ބޭނުންވާ އެމިނޯ އެސިޑުތައް ލިބެއެވެ. މީގެ އިތުރުން ކުކުޅަކީ އޭގައި ޒިންކު އަދި އަޔަންވެސް ހިމެނޭ އެއްޗެކެވެ. މި ދެ މާއްދާއަކީވެސް އިސްތަށިގަނޑު ވަރުގަދަ ކުރުމުގައި އެހީވެދޭ މާއްދާތަކެވެ. ކެއުމުގައި ކުކުޅު ހިމަނާނަމަ އޭގެ ސަބަބުން އިސްތަށިތަކުގެ ސިއްހަތު ރަނގަޅުވެ، އިސްތަށި ފަޅާ މިންވަރު އިތުރުވެއެވެ. އަދި ހަމަ އެހެންމެ އިސްތަށިގަނޑު ވަރުގަދަ ކުރުމުގައިވެސް އެހީވެދެއެވެ.

މަސްދަރު: ޓައިމްސްއޮފްއިންޑިއާ