ސިއްހީ ނިޒާމު ފުނޑުފުނޑު ކޮށްލުމުގެ ނިޔަތުގައި ނިރުބަވެރި އިސްރާއީލުން ޣައްޒާގެ ހޮސްޕިޓަލަކަށް ފަސް ވަނަ ފަހަރަށް ބޮން އަޅައިފިއެވެ.

އެމެރިކާގެ މަދަދާއެކު އިސްރާއީލުން ޣައްޒާގައި ހިންގަމުންދާ ލާއިންސާނީ އަމަލުތަކުގެ ތެރެއިން މިފަހަރު ހަމަލާދިނީ ޣައްޒާގެ ކަމާލް އަދްވާން ހޮސްޕިޓަލަށެވެ. އިސްރާއީލުގެ ކުއަޑްކޮޕްޓާ ޑްރޯންތަކުން ދިން މި ހަމަލާއަކީ އެ މެޑިކަލް ފެސިލިޓީއަށް ނިރުބަވެރިން ދިން ފަސްވަނަ ހަމަލާއެވެ.

މި ހަމަލާއާ ގުޅިގެން ކަމާލް އަދްވާން ހޮސްޕިޓަލްގެ ޑިރެކްޓަރު ޑރ. ހުޝާމް އަބޫ ސާފިޔާ ވިދާޅުވީ މެޑިކަލް ފެސިލިޓީއަށް އިސްރާއީލުން ދިން ހަމަލާގައި ތިން މެޑިކަލް ސްޓާފަކު ޒަހަމްވި ކަމަށެވެ. އޭގެ ތެރެއިން އެކަކުގެ ހާލު ސީރިއަސް ކަމަށާއި އޭނާގެ ސާޖަރީއެއް ހަދަމުންދާ ކަމަށް އޭނާ ވިދާޅުވިއެވެ.

ޣައްޒާގެ ސިއްހަތާ ބެހޭ ވުޒާރާއިން ނެރުނު ބަޔާނެއްގައި ހޮސްޕިޓަލްގެ ޑިރެކްޓަރު އަބޫ ސާފިޔާ ވަނީ ހާލަތު ވަރަށް ނުރައްކާތެރިވެފައިވާ ކަމަށް ވިދާޅުވެފައެވެ.

ބޭރުގެ މީޑިޔާ، އަލް ޖަޒީރާ ނޫހުން ރިޕޯޓުކުރާ ގޮތުގައި އިސްރާއީލުގެ ނިރުބަވެރިން ދަނީ އަލްއަހްލީ ހޮސްޕިޓަލަށްވެސް ހަމަލާތައް ދެމުންނެވެ. މި ހަމަލާތަކުގައި އެތަނަށް ބޮޑެތި ގެއްލުންތަކެއް ލިބެމުންދާ އިރު، އިސްރާއީލުން ޣައްޒާ ސިޓީއަށް ދެމުން ގެންދާ ހަމަލާތައް "އިތުރުވެފައިވާ" ކަމަށް ނޫހުގައި ވަނީ ރިޕޯޓުކޮށްފައެވެ.

މީގެ ކުރިންވެސް އިސްރާއީލުން ވަނީ ޣައްޒާގެ ސިއްހީ ދާއިރާގައި ހަރަކާތްތެރިވާ ފަރާތްތަކަށާއި ސިއްހީ ހިދުމަތްދޭ ތަންތަނަށާއި ވެހިކަލްތަކަށްވެސް ހަމަލާދީފައިކަން ފާހަގަ ކުރެވެއެވެ.