ދިވެހިރާއްޖޭގެ ލޮބުވެތި ރައްޔިތުން ކެތްތެރިވެ ރައީސް ޑރ. މުހައްމަދު މުއިއްޒަށް ވަގުތު ދެއްވުމަށް ފަތުރުވެރިކަމާ ބެހޭ ވަޒީރު އިބްރާހިމް ފައިސަލް އެދިވަޑައިގެންފިއެވެ.

އެމްއެމް ޓީވީއަށް ދެއްވި ބަސްދީގަތުމެއްގައި ވަޒީރު ފައިސަލް ވިދާޅުވީ މި ސަރުކާރު ވެރިކަމާ ހަވާލުވިއިރު ރާއްޖެ އޮތީ "ޑިފޯލްޓް" ވާ ހިސާބުގައި ކަމަށެވެ. ނަމަވެސް މި ހާލަތު މެނޭޖް ކުރެވުނީ ރައީސް މުއިއްޒު ވެރިކަމާ ހަވާލުވެވަޑައިގެން އެޅުއްވި ހަރުދަނާ ފިޔަވަޅުތަކުގެ ސަބަބުން ކަމަށް އޭނާ ވިދާޅުވިއެވެ.

ފައިސަލް ވިދާޅުވީ ކުރީ ސަރުކާރުން ކުރަމުންދިޔަ ފައިސާ ޗާޕު ކުރުމުގެ މަސައްކަތް މި ސަރުކާރުން ހުއްޓާލައި، ބޮޑުތަނުން ހަރަދުތައް ކުޑަކުރެއްވި ކަމަށެވެ. އަދި ދިވެހިރާއްޖޭގެ ރައްޔިތުންގެ ފަރާތުން ކެތްތެރިކަމާއެކީގައި ރައީސް ޑރ. މުހައްމަދު މުއިއްޒަށް ވަގުތު ދިނުމަށް އިލްތިމާސް ކުރައްވާ ކަމަށް ފައިސަލް ވިދާޅުވި އެވެ.

މި ބަސްދީގަތުމުގައި ފައިސަލް އިތުރަށް ވަނީ ދިވެހި ގައުމާއި ރައްޔިތުންގެ ހައްގުގައި ރައީސް މުއިއްޒު އުނދަގޫ ނިންމެވުންތަކެއް ނިންމަވަމުން ގެންދަވާ ކަމަށް ވިދާޅުވެ އެކަމަށް ފަތުރުވެރިކަމުގެ ދާއިރާގެ ހުރިހާ ފަރާތްތަކަކުން ވެސް އެއްބާރުލުން ދިނުމަށް ގޮވާލައްވާފަ އެވެ.

ވަޒީރު ވިދާޅުވީ މިހާރު އެންމެ ބޮޑު އެއް މައްސަލައިގެ ގޮތުގައި ހިމެނޭ ޑޮލަރު މާރުކުރުމުގެ ކަންކަމުގައި ވެސް ލުއިތަކެއް މިހާރު ހޯދައިދީފައިވާނެ ކަމަށެވެ. އަދި މިވަގުތު ރައީސަށް އެއްބާރުލުންދީ މަޝްވަރާ އަށް ވަޑައިގަތުމަށް ވެސް ވަޒީރު އިލްތިމާސްކުރެއްވި އެވެ.