ހާއްސަ އެހީއަށް ބޭނުންވާ ކުދިންނަށް ކިޔަވައިދޭ ސެން ޓީޗަރުން އުފައްދަން މުޅިން އާ ކޮންސެޕްޓަކަށްޗޕްރޮގްރާމެއް ފަށަން ތައްޔާރުވެފައިވާ ކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވީ މާފަންނު މަދުރަސާއަށް 40 އަހަރު ފުރުމާ ގުޅިގެން ބޭއްވި ރަސްމިއްޔާތުގައި ދެއްކެވި ވާހަކަފުޅުގައެވެ. ރައީސް ޑރ. މުޙައްމަދު މުއިއްޒު ވިދާޅުވީ އާ ޕްރޮގްރާމުގެ ދަށުން ހުރިހާ ޓީޗަރުންނަކީ ވެސް ހާއްސަ އެހީއަށް ބޭނުންވާ ކުދިންނަށް ކިޔަވައިދެވޭ ފެންވަރަށް ތަމްރީނުވެފައިވާ ޓީޗަރުންނަށް ހެދުމަށް މަސައްކަތް ކުރާނެ ކަމަށެވެ. އަދި އެ ޕްރޮގްރާމުގެ ދަށުން ސެން ޓީޗަރުންގެ ގޮތުގައި ވެސް ހާއްސަ ބަޔަކު ތަމްރީނު ކުރާނެ ކަމަށް ރައީސް ވިދާޅުވިއެވެ.

"އިރާދަކުރެއްވިއްޔާ، ކުރިއަށް އޮތް ތަނުގައި ޚާއްޞަ އެހީއަށް ބޭނުންވާ ކުދިންނަށް އިންކްލޫސިވް ގޮތެއްގައި ހަމަ އެއްވެސް ތަފާތެއް ނުގެނެސް، ތަޢުލީމީ ފުރުޞަތު ހޯދައިދިނުމުގައި އަޅުގަނޑުމެންގެ މެނިފެސްޓޯގައި ކަނޑައަޅާފައި އޮތް ގޮތަށް، އެ ސިޔާސަތު ތަންފީޛު ކުރުމަކީ އަޅުގަނޑު ހަމަ އެންމެ ބޭނުންވާ ގޮތް. އެގޮތަށް އެކަންތައް އިރާދަކުރެއްވިއްޔާ ކޮށްދެވޭނެ ކަމަށް އަޅުގަނޑު ޔަޤީންކުރަން." ރައީސް މުޢިއްޒު ވިދާޅުވިއެވެ.

މީގެ އިތުރުން ވެސް ރައީސް މުޢިއްޒު ވިދާޅުވީ އަންނަ އަހަރު ރާއްޖޭގެ އެކި ކަންކޮޅުގެ ޓީޗަރުންނަށް އެ ޕްރޮގްރާމު ފަށައިގެން ޑިޕްލޮމާއިން ޑިގްރީ ފެންވަރަށް ތަމްރީނު ކުރުމުގެ މަސައްކަތް ކުރިއަށް ގެންދާނެ ކަމަށެވެ.

"އެޑިޔުކޭޝަން މިނިސްޓްރީން މިހާރު އެވަނީ ރާއްޖޭގެ ހުރިހާ ދިމާއެއްގައި ހުރި މިފަދަ ސްކޫލްތައް ޝާމިލުވާ ގޮތެއްގައި އެކަން ފުޅާކުރުމުގެ މަސައްކަތްތަކެއް ފަށާފައި. އުންމީދު ކުރަނީ، މި އަންނަ އަހަރުގެ ތެރޭގައި، އެކި ލެވެލް ލެވެލްއަށް ޓްރޭނިންގ ދިނުމަށް، ޑިޕްލޮމާ އިން ފެށިގެން ޑިގްރީއާ ހަމަޔަށް ޓްރޭނިންގ ދިނުމުގެ ޕްރޮގްރާމްތަކެއް ގެންދިޔުމުގެ މަސައްކަތް ކުރާތީ، އެކި ދުވަސްވަރަށް އެކި ކުދިންނަށް އެކި ޓީޗަރުން ތަމްރީނު ކުރެވިގެންދާނެ ކަމަށް." ރައީސް ވިދާޅުވިއެވެ.