ރަނގަޅު ފެންވަރުގެ ހޮސްޕިޓަލެއް ގާއިމުކޮށްދޭން ރައީސް ޑރ. މުހައްމަދު މުއިއްޒަށް، ތޮއްޑޫ ކައުންސިލުން ހުށައަޅައިފި އެވެ.

ދެ އަތޮޅެއްގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ރައީސް މުއިއްޒު ތޮއްޑޫއަށް ވަޑައިގެންނެވީ މިއަދު ހެނދުނު އެވެ.

އެ ބައްދަލުވުމުގައި ތޮއްޑޫ ކައުންސިލުން ވަނީ ސިއްހީ ހިދުމަތް ދިނުމުގައި ހުރި ގޮންޖެހުންތައް ފާހަގަކޮށްފަ އެވެ. އަދި ކައުންސިލުން އެދުނީ މިހާރަށްވުރެ ފެންވަރު ރަނގަޅު ސިއްހީ މަރުކަޒެއް އެ ރަށުގައި ގާއިމުކޮށްދިނުމަށެވެ.

ހޮސްޕިޓަލުގެ އިތުރުން ތޮއްޑޫގެ ސްކޫލުގެ ޖާގައިގެ ދަތިކަމާއި، ތޮއްޑޫގެ އިގުތިސާދު ރަނގަޅުކުރުމަށް ފައިނޭންސް ލިބޭނެ އިތުރު އިންތިޒާމުތައް ހަމަޖައްސައިދިނުމަށް ވެސް ތޮއްޑޫ ކައުންސިލުން ވަނީ އެދިފަ އެވެ.

އެ ބައްދަލުކުރެއްވުމުގައި ރައީސް ވިދާޅުވީ އެމަނިކުފާނު ވައުދުވެވަޑައިގެންފައިވާ ކަންކަން ބަޖެޓުގައި ހިމަނުއްވައިގެން ކުރިއަށްގެންދަވާނެ ކަމަށެވެ.

އަދި ރަށުގެ މަގު ހެދުމުގެ މަޝްރޫއުވެސް ކުރިއަށް ގެންދަވާނެކަމަށް އެމަނިކުފާނު ވިދާޅުވިއެވެ.

އެ ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ތޮއްޑޫގެ ތަރައްގީއަށް ކުރިއަށްގެންދާ މަޝްރޫއުތަކުގެ އެންމެ ފަހުގެ މައުލޫމާތުތައް ހިއްސާކުރައްވާފަ އެވެ.