މިސަރުކާރަށް ކުރިމަތިވި އެންމެ ބޮޑު ގޮންޖެހުމަކީ ސިޔާސީ ވިސްނުމެއްގައި 19 ވަނަ މަޖިލީހުން ފާސްކޮށްފައި އޮތް ބަޖެޓް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވުމާ ގުޅިގެން ކުރީގެ މާލީ ވަޒީރު އިބްރާހިމް އަމީރު އެކަމަށް ރައްދު ދެއްވައިފިއެވެ.

މީސްމީޑިއާގައި މިއަދު ޙިއްސާ ކުރެއްވި މެސެޖެއްގައި އަމީރު ވަނީ މިއަހަރު ތަރައްޤީގެ މަޝްރޫޢުތައް ކުރިއަށް ނުގެންދެވުނީ ކުރީގެ މަޖިލީހުން ބަޖެޓް އެކުލަވާލުމުގައި މިސަރުކާރުގެ މަޝްރޫޢުތަކަށް ޖާގަދިނުމެއްނެތި އިޤްތިޞާދު ބަނގުރޫޓު ކުރުމުގެ ވިސްނުމުގައި ބަޖެޓް އެކުލަވާލުމުން ކަމަށް ރައީސް މުޢިއްޒު ވިދާޅުވި ވާހަކަފުޅު ދޮގު ކުރަށްވާފައެވެ.

އެގޮތުން އަމީރު ވިދާޅުވީ ކުރީ ސަރުކާރުން ޓްރާންޒިޝަން މުއްދަތުގައި ހުށަހެޅި ސަޕްލިމެންޓަރީ ބަޖެޓާއި 2024 ވަނަ އަހަރުގެ ދަޢުލަތުގެ ބަޖެޓް ވެސް ހުށަހެޅީ ރައީސް މުޢިއްޒުގެ ޓްރާންޒިޝަން ކޮމިޓީގެ މަޝްވަރާއާ އެކު ކަމަށެވެ.

“2024 ވަނަ އަހަރަށް ހުށަހެޅުނު ބަޖެޓްގައި ތި ބޭފުޅުން ފޮނުވި ލިސްޓް އޮތް ގޮތަށް ބަޖެޓްގައި ހިމެނިފައިވާނެ. އެހެން ނޫނަސް ބަޖެޓު އޮތް ގޮތުން ކަންތައް ނުވިޔޭ، ވިދާޅުވާއިރު މި ހާާލަތަށް އައީވެސް ސީދާ ބަޖެޓްގައި ނުވެސް ހިމެނޭ އާ ކަންތައްތަކެއް ކުރުމުގެ ސަބަބުން. ބަޖެޓް ޕްލޭނާއި އެއްގޮތަށް ގެންދިޔަ ނަމަ އިޤްތިސާދީ ހަރަކާތްތައް ނުހުއްޓި ކުރިޔަށް ދާނެ. އަމިއްލަ ފަރުދުންނާއި ކުންފުނިތައް ބަނގުރޫޓް ނުވީސް.” އަމީރު ވިދާޅުވެފައިވެއެވެ.

ހަމައެއާއެކު އަމީރު ވަނީ މިސަރުކާރުން ފުށިދިއްގަރު ފަޅު ހިއްކަން އެތައް ސަތޭކަ މިލިއަނެއް ޚަރަދުކޮށް ތުރުކީ ވިލާތުން ޑްރޯން ގަންނަން 37 މިލިއަން ޑޮލަރު ހޭދަކުރީ ބަޖެޓްގެ ކޮންތަނެއްގައި ހިމަނައިގެންތޯ ސުވާލު އުފައްދާފައެވެ.

އޭގެއިތުރުން މިދިޔަ އަހަރާއި އަޅާބަލާއިރު މިއަހަރުގެ މިހާތަނަށް ހަމައެކަނި މުސާރަޔަށް 1.425 ބިލިއަން ރުފިޔާ އިތުރަށް ޚަރަދުކޮށްފައިވާ ކަމަށާއި މީގެ އިތުރުންވެސް ބަޖެޓްގައި ނުހިމެނޭ އެތައްކަމެއް ކޮށްފައިވާ ކަމަށް އަމީރު ވިދާޅުވިއެވެ.

“ދެން ރަށެއްގަ ޕްރޮޖެކްޓް ނުހިނގާތީ ސުވާލުކުރީމަ ކުރީ ސަރުކާރު، ކުރީ ސަރުކާރު ކިޔުން ހުއްޓަން ވެއްޖެއެއްނު! ރައްޔިތަކަށް ކަމެއް ކޮށްދޭންވީމަ ކުރީ ސަރުކާރުގެ ބަޖެޓާއި ހެދި ކަމެއް ނުވޭ. އެކަމަކު ކޮށްފައި ހުރީ ބަޖެޓްގައި ނުވެސްނެތް ކަންތައްތައް. އޭގެން އަރައިނުގަނެވިގެން މިހާރު މި އުޅެންޖެހެނީ!” ސަރުކާރަށް ރައްދު ދެއްވަމުން އަމީރު ވިދާޅުވިއެވެ.

އަމީރު ވިދާޅުވީ މިސަރުކާރަށް މިއަހަރު ނުވި ކަމެއް ކުރިޔަށް އޮތް 4 އަހަރުވެސް ނުވާނެ ކަމަށެވެ. ހަމައެހެންމެ ސަރުކާރު ބަދަލުވެ އާބޭފުޅަކު ބަޖެޓް ހުށަހެޅުމުން ޕްރޮޖެކްޓްތައް ކުއްލިޔަކަށް ހިނގަން ނުފަށާނެ ކަމަށްވެސް އަމީރު ވިދާޅުވެފައިވެއެވެ.

“ކަންތައްތައް ކުރާނެ ވިސްނުމެއްވެސް، ޤާބިލްކަމެއްވެސް އަދި އެ އިޚްލާސްތެރި ކަމެއްވެސް ނެތް.” ރައީސް ރަސްދޫގައި ދެއްކެވި ވާހަކަފުޅާމެދު ހިތްހަމަ ނުޖެހުން ފާޅު ކުރަށްވަމުން އަމީރު ވިދާޅުވިއެވެ.

އަމީރު މިހެން ވިދާޅުވެފައިވާއިރު ރައީސް މުޢިއްޒު މިއަދު ވިދާޅުވީ މިސަރުކާރަށް ރާއްޖޭގެ އިގްތިޞާދު ސަލާމަތް ކުރެވުނީ ވަރަށް ގިނަ ކަންކަމަށް އިސްކަންދީގެން ކުރެވުނު މަސައްކަތުން ކަމަށާއި މިހާރު ގާއިމުކޮށްފައިވާ ބިންގަލުގެ މަތީގައި އިގްތިސާދު ދެން ދާނީ ކުރިއަށް ކަމަށެވެ.