ކޮންމެ ކަމެއްގައިވެސް ރައީސް ޑރ. މުޙައްމަދު މުޢިއްޒު އިސްކުރަށްވަނީ އިންސާފާއި ރައްޔިތުންގެ މަސްލަޙަތު ކަމަށް ފަހިދިރިއުޅުން ކޯޕަރޭޝަންގެ މެނޭޖިންގ ޑިރެކްޓަރ ޙަމްދާން ޝަކީލް ވިދާޅުވެއްޖެއެވެ.

ޙަމްދާން މިހެން ވިދާޅުވީ މިސަރުކާރުން އިންތިޚާބުތަކާއި ދިމާކޮށް ކުށްވެރިން ދޫކޮށް ނުލާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވުމާ ގުޅިގެންނެވެ.

އެކަމާގުޅިގެން ޙަމްދާން ވިދާޅުވީ ކޮންމެ ކަމެއްގައިވެސް ރައީސް ޑރ. މުޢިއްޒު އިސްކުރަށްވަނީ އިންސާފާއި ރައްޔިތުންގެ މަސްލަހަތާއި ރައްޔިތުންނަށް އެންމެ ފައިދާ ވާނެ ގޮތް ކަމަށެވެ.

“މިއީ ރައްޔިތުންގެ ސަރުކާރެއް. މިއީ ރައްޔިތުންގެ ރައީސެއް.” ޙަމްދާން ވިދާޅުވެފައިވެއެވެ.

ޙަމްދާން މިހެން ވިދާޅުވެފައިވާއިރު މިއަދު އއ. ތޮއްޑޫގައި ރައީސް ޑރ. މުޙައްމަދު މުޢިއްޒު ވިދާޅުވީ ކުރީ ސަރުކާރުތަކުން އިންތިޚާބުތަކާއި ދިމާކޮށް ސިޔާސީ ވިސްނުމުގައި ނުރައްކާތެރި ކުށްވެރިން މުޖުތަމަޢަށް ދޫކޮށްފައިވާ ކަމަށެވެ. ނަމަވެސް އެއީ މިސަރުކާރުގެ ވިސްނުން ނޫން ކަމަށާއި ކަންކުރާނެ ގޮތްވެސް ނޫން ކަމަށް ރައީސް ވިދާޅުވިއެވެ.

ރައީސް މިއަދު ވިދާޅުވީ ނިމިދިޔަ ރިޔާސީ އިންތިޚާބާ ދިމާކޮށް ރައީސް އިބްރާހިމް މުޙައްމަދު ޞާލިޙްގެ ސަރުކާރުން 429 ޤައިދީއަކު ދޫކޮށްފައިވާ ކަމަށެވެ. އަދި 2022 ވަނަ އަހަރު 256 ޤައިދީންނާއި 2021 ވަނަ އަހަރުގެ ލޯކަލް ކައުންސިލް އިންތިޚާބާއި ދިމާކޮށް 458 ޤައިދީއަކާއި 2019 ވަނަ އަހަރު ބޭއްވުނު ރައްޔިތުންގެ މަޖިލީސް އިންތިޚާބާއި ދިމާކޮށް 762 ޤައިދީއަކު މިނިވަންކޮށްފައިވާކަމަށް ރިކޯޑްތަކުން ފެންނަން ހުރި ކަމަށް ރައީސް ވިދާޅުވެފައިވެއެވެ.

އޭގެއިތުރުން ރައީސް ވިދާޅުވީ އެމަނިކުފާނުގެ ވެރިކަމަށް އަހަރެއްވެގެން ދިޔައިރު ދޫކޮށްލާފައިވަނީ ޖުމްލަ 86 ގައިދީން ކަމަށެވެ.