މޫސުމީ ބަދަލުތައް ފަދަ ނާޒުކު ކަންކަމުން އަރައިގަތުމަށް އާބާރަކާއެކު މަަސައްކަތް ކުރުމަށް ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕޮރޭޝަން (ސާކް)ގެ ކިބައިން ރައީސް ޑރ. މުހައްމަދު މުއިއްޒު އެދިވަޑައިގެންފިއެވެ.

އެމަނިކުފާނު މިކަމަށް އެދިވަޑައިގެންނެވީ ސާކްގެ 40ވަނަ ޗާޓާ ދުވަހުގެ މުނާސަބަތުގައި ފޮނުއްވި ތަހުނިޔާގެ މެސެޖެއްގައެވެ. ރައީސް މުޢިއްޒުގެ މެސެޖުގައި ވަނީ ސާކްގެ ސެކްރެޓަރީ ޖެނެރަލަށާއި، ސާކްގެ ސެކްރެޓޭރިއެޓަށާއި ސާކާ ގުޅިފައިވާ ހުރިހާ މުއައްސަސާތަކަށާއި ދެކުނު އޭޝިއާގެ ޤައުމުތަކުގެ ރައްޔިތުންނަށް، ދުވަހުގެ ހެޔޮއެދުމާއި ތަހުނިޔާ ފޮނުއްވާފައެވެ. ރައީސްގެ މެސެޖްގައި ސަރަހައްދީ ސުލްހަމަސަލަސްކަން ހާސިލުކުރުމަށްޓަކައި ސާކް ޗާޓަރުގައި ބަޔާންކޮށްފައިވާ އުސޫލުތަކާއި އަސާސްތަކަށް އަލި އަޅުއްވާލައްވާފައިވެއެވެ.

ރައީސް ވަނީ މޫސުމަށް އަންނަ ބަދަލުތަކާއި، އާންމު ސިއްހަތާއި، އިޤުތިޞާދީ ހަމަހަމަކަން ފަދަ، ނާޒުކު މައްސަލަތަކަށް ހައްލު ހޯއްދަވައިދެއްވުމަށް ކުރައްވާ މަސައްކަތްތައް އާ ބާރެއްލައިގެން ކުރެއްވުމަށް އެދިވަޑައިގެންފައެވެެ. އަދި އެ މެސެޖުގައި، ދެމެހެއްޓެނިވި ތަރައްޤީއާއި އުފެއްދުންތެރިކަމާއި ވިލުންތެރި ބިނާރުތަކަށް އިސްކަންދިނުމުގެ މުހިންމުކަން އެމަނިކުފާނު ފާހަގަކުރެއްވިއެވެ.

ރައީސްގެ މެސެޖު ނިންމަވާލައްވަމުން، ދެކުނު އޭޝިއާގެ ރައްޔިތުންނަށް އުފާވެރި، އުޖާލާ މުސްތަޤުބަލެއް ބިނާކުރުމަށްޓަކައި، ސާކްގެ މަސައްކަތްތައް އިތުރަށް ހަރުދަނާކުރުމަށާއި، ޝާމިލުވުން އިތުރުކުރުމަށް ރާއްޖެއިން އަބަދު ވެސް މަސައްކަތް ކުރާނެކަމުގެ ޔަޤީންކަން ދެއްވާފައިވެއެވެ.

"ސާކް ޗާޓާ ޑޭ"ގެ ގޮތުގައި ފާހަގަކުރަނީ ކޮންމެ އަހަރެއްގެ ވެސް ޑިސެމްބަރު މަހުގެ އަށްވަނަ ދުވަހެވެ.