އއ. މަތިވެރީގައި އަޅަން ނިންމާފައިވާ އެއަރޕޯޓުގެ އަމަލީ މަސައްކަތް މިއަންނަ އަހަރު ފަށާނެކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ، އއ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު މަތިވެރީގައި މިރޭ ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.

ރައީސްގެ ވާހަކަފުޅުގައި ވިދާޅުވީ، ސަރުކާރުން މަޝްރޫއުތައް ގެންދަން ބޭނުންވި ބާރުމިނުގައި މި އަހަރު ނުގެންދެވުނު މައިގަނޑު ސަބަބަކީ ތަންފީޒު ކުރައްވަން ޖެހުނީ ކުރީ ސަރުކާރުގެ ބަޖެޓެއްކަމަށް ވުމުންކަމަށެވެ.

ނަމަވެސް މިއަންނަ އަހަރު ވެގެންދާނީ މަޝްރޫއުތައް ފެށިގެންދާނެ އަހަރެއްގެ ގޮތުގައި އެމަނިކުފާނު ފާހަގަ ކުރެއްވިއެވެ.

އެގޮތުން މަތިވެރީގައި އަޅާ އެއަރޕޯޓުގެ މަސައްކަތް ފެށިގެން ދާނެކަމަށާއި އެކަމާއި ގުޅޭގޮތުން މިނިސްޓްރީއާއި ކައުންސިލް ގުޅިގެން ކޮންސެޕްޓްގެ ކަންކަމުގައި ރައްޔިތުންގެ ހިޔާލު ހޯއްދެވުމަށް އެމަނިކުފާނު އެދިވަޑައިގެންނެވިއެވެ.

ރައީސް ވިދާޅުވީ، ދަތުރުފަތުރުގެ ކަންކަން ފަހި ކުރުމަށް ރާއްޖޭގެ އެކި ހިސާބުތަކުގައި އެއަަރޕޯޓު އެޅުމުގެ މަސައްކަތް ކުރިއަށް ގެންދަވާނެ ކަމަށެވެ.

މި ޖަލްސާގައި ރައީސް ވަނީ އެއަރޕޯޓު މަޝްރޫއުގެ އިތުރުން އެ ރަށުގެ ބިން ހިއްކުމުގެ މަސައްކަތް ވެސް ކުރިއަށް ގެންދަވާނެކަމަށް ވިދާޅުވެފައެވެ.