މޯލްޑިވްސް އިންލެންޑް ރެވެނިއު އޮތޯރިޓީގެ ހުސްވެފައިވާ ބޯޑު މެމްބަރުކަމަށް ކުރިމަތިލި 5 ބޭފުޅެއްގެ ނަން ދިރާސާ ކުރުމަށް މަޖިލީހުގެ އިޤްތިސާދީ ކޮމިޓީއަށް ފޮނުވައިފިއެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ވަނީ ޓެކްސް ނެގުމާ ބެހޭ އިދާރީ ޤާނޫނުގައިވާ ގޮތުގެ މަތިން މީރާގެ ހުސްވެފައިވާ ބޯޑު މެމްބަރުކަމަށް ކުރިމަތިލުމަށް ހުޅުވާލި ފުރުސަތުގައި އެ މަޤާމަށް ކުރިމަތިލި ފަރާތްތަކުގެ ތެރެއިން، ރައީސުލްޖުމްހޫރިއްޔާ ފޮނުއްވި ނަންފުޅުތައް އިއްވާފައެވެ.

އޭގެ ތެރޭގައި ހިމެނެނީ ދަހާ ޝުހައިބް، ހ ކެރީބިއަން، އަހުމަދު ފާއިޒު މުޙައްމަދު، އަސްރަފީހިޔާ ލ މާވަށް، އަބްދުﷲ އިމްރާން، މާލަން ރ ހުޅުދުއްފާރު، މަހްޒޫމް ސަލީމް، ޝަބްނަމްގެ ކ ކާށިދޫ އަދި އާމިނަތު އާފިޔާ ދަފްތަރު ނަންބަރު ރ.ސ. 13462 އެވެ.

ރައީސްގެ ސިޓީގައި އެދިވަޑައިގެންފައިވަނީ މީރާގެ ޑިރެކްޓަރުންގެ ބޯޑަށް އައްޔަނު ކުރެއްވުމަށް މެންބަރުންނަށް ފެނިވަޑައިގަންނަވާ ބޭފުޅެއްގެ ނަން މަޖިލީހުން ފާސް ކުރައްވައި އެނަންފުޅު އެމަނިކުފާނަށް ފޮނުއްވައި ދެއްވުމަށެވެ.

އެހެންކަމުން މިއަދުގެ ޖަލްސާގައި އެމައްސަލަ ދިރާސާ ކުރުމަށް މަޖިލީހުގެ އިޤްތިސާދީ ކޮމިޓީއަށް ވަނީ ފޮނުވާފައެވެ.

މީރާގެ ބޯޑުގައި މި ވަގުތު ހަތް މެންބަރުން ތިއްބަވައެވެ. އެއީ ކޮމިޝަނާ ޖެނެރަލް އޮފް ޓެކްސްޓޭޝަން ހަސަން ޒަރީރު، ޑެޕިއުޓީ ޗެއާޕާސަން ލީނާ މުހައްމަދު ޒާހިރު ހުސައިން، ޗެއާޕަސަން އަހުމަދު ސާއިދު މުސްތަފާ، ބޯޑު މެންބަރު އައިޝަތު އަޝާ އަލީ، ބޯޑު މެންބަރު މަހްޒޫމް ސަލީމް އަދި ބޯޑު މެންބަރު މުމްތާޒް އަބްދުއްރަޝީދުގެ އިތުރުން ބޯޑު މެންބަރު ހުޝާމް ވަހީދެއެވެ