ރައްޔިތުންގެ މަޖިލީހުގެ މެންބަރެއް ޕާޓީން ވަކިކޮށްގެން ގޮނޑި ގެއްލޭ ގޮތަށް ގާނޫނު އަސާސީއަށް ގެނައި ބަދަލު ދެމި އޮންނަ މުއްދަތުގައި، ރައްޔިތުންގެ ހައްގުގައި ވަކާލާތުކޮށްގެން ނުވަތަ އެމްޑީޕީއަށް ސޮއިކުރުމުގެ ސަބަބުން ގޮނޑި ގެއްލިއްޖެ ނަމަ އެ މެންބަރަކު ތަމްސީލުކުރި ދާއިރާއަށް އަލުން އިންތިހާބު ކުރަން އެހީތެރިވުމަށް އެމްޑީޕީގެ ގައުމީ މަޖިލީހުން މިރޭ ފާސްކޮށްފިއެވެ.

ކާނިވާ ސަރަހައްދުގައި މިރޭ ކުރިއަށްދާ އެމްޑީޕީގެ ގައުމީ މަޖިލީހަށް އެގަރާރު ހުށައެޅުއްވީ ކޮލަމާފުށި ދާއިރާގެ ރައީސް މަހުފޫޒު ސައީދެެވެ.

އެގަރާރުގައި ބުނެފައިވަނީ ރައްޔިތުންގެ މަސްލަހަތުގައި އެމްޑީޕީން ކުރަމުންދާ މަސައްކަތުގައި ބައިވެރިވުމުގެ ގޮތުން، އެ މެންބަރު ނިސްބަތްވާ ޕާޓީން ވަކިވެ އެމްޑީޕީއާ ގުޅުމުން ގޮނޑި ގެއްލުމުން ވެސް އެ މެންބަރަކު އަލުން އިންތިހާބު ކުރުމަށް އެހީވާންޖެހޭނެ ކަމަށެވެ. އަދި އެ މެންބަރަކު ތަމްސީލުކުރި ދާއިރާއިން ރައްޔިތުންގެ މަޖިލީހަށް މެންބަރަކު އިންތިހާބު ކުރުމަށް ބާއްވާ ބައި އިލެކްޝަނުގައި، ރައްޔިތުންގެ މަޖިލީހުން ވަކިކުރެވުނު މެންބަރު ވާދަކުރާނަމަ އެމްޑީޕީން އެ މެންބަރަކަށް ތާއީދުކުރުމަށާއި، އެ މެންބަރަކު އަލުން ރައްޔިތުންގެ މަޖިލީހަށް އިންތިހާބުކުރުމަށް ދިވެހިރައްޔިތުންގެ ޑިމޮކްރަޓިކް ޕާޓީގެ ފަރާތުން އެ މެންބަރަކާއެކު މަސައްކަތްކޮށްދިނުމަށް އެއްބަސްވާ ކަމަށް އެގަރާރުގައި ބުނެފައިވެއެވެ.

އެގަރާރުގައި ބުނެފައިވާގޮތުގައި ގާނޫނުއަސާސީއަށް ގެނައި ބަދަލަކީ ރައްޔިތުންގެ ބާރުވެރިކަން ނިގުޅައިގަނެ، ރައްޔިތުންގެ މަޖިލީހުގެ މެންބަރުން ރައްޔިތުންގެ މަސްލަހަތުގައި މަސައްކަތްކުރުމަށް އޮތް މިނިވަން އިހުތިޔާރު ވެސް ނިގުޅައިގަންނަ، އަދި ގާނޫނުއަސާސީގެ އަސާސީ އޮނިގަނޑާ ވެސް ހިލާފު ބަދަލެއްކަމަށެވެެ. އަދި ގާނޫނު އަސާސީއަށް ގެނައި ބަދަލު ގާނޫނު އަސާސީގެ 75 ވަނަ މާއްދާއާ ހިލާފު ކަމަށާއި ގާނޫނުއަސާސީގެ ހަތަރު ވަނަ މާއްދާއިން ރައްޔިތުންނަށް ލިބިދީފައި އޮތް ބާރުވެރިކަން ގެނައި ބަދަލުތަކުން ނިގުޅިގެންދާކަމަށް ވެސް ގަރާރުގައި ބުނެއެވެ.

އެގަރާރުގައި ގާނޫނުއަސާސީއަށް ގެނައި ބަދަލު އިހު އޮތް ގޮތަށް ރުޖޫއަ ކުރުމަށް ރައްޔިތުންގެ މަޖިލީހަށާއި، ސަރުކާރަށް ވެސް ގޮވާލިއެވެ. އަދި ގާނޫނުއަސާސީއަށް މި ގެނައި ބަދަލު އިހު އޮތް ގޮތަށް ރުޖޫއަކުރުމާ ހަމައަށް، މުޅި ރާއްޖޭގެ އެކި ކަންކޮޅުތަކުގައި އިހުތިޖާޖު ކުރުމުގެ ގޮތުން އެކިއެކި ސިޔާސީ ހަރަކާތްތައް ހިންގައި، މި ބަދަލުގެ ސަބަބުން ނުކުންނަ ނަތީޖާތަކާމެދު ރައްޔިތުން ހޭލުންތެރިކުރުވުމަށް ފުޅާ ދާއިރާއެއްގައި ކެމްޕޭނު ހިންގުމަށް ވެސް ގައުމީ މަޖިލީހަށް ހުށައެޅި ގަރާރުގައި ބުނެފައިވެއެވެ.

އަދި އެ ގަރާރުގެ ދަށުން އެމްޑީޕީން ހިންގާ ހަރަކާތްތަކުގައި ބައިވެރިވުމަށް ރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީތަކަށާއި، މަދަނީ ޖަމިއްޔާތަކަށާއި، ފަންނީ ދާއިރާތަކުގެ ބޭފުޅުންނަށް ދައުވަތުދީ، ދޭ ދައުވަތު ގަބޫލުކުރާ އެންމެން ގުޅިގެން މުޅި ރާއްޖެއަށް ސިޔާސީ ހަރަކާތްތައް ފުޅާކޮށް، ރާއްޖޭގެ ކަންކޮޅުތަކުގައި އެކިއެކި އިހުތިޖާޖުތައް ރާވައި ހިންގުމަށް ވަނީ ނިންމާފައެވެ. އެގަރާރު އެމްޑީޕީގެ ގައުމީ މަޖިލީހުން ފާސްކޮށްފައިވަނީ މެމްބަރުންގެ އިއްތިފާގުންނެވެ.