ގއ. މާމެންދުއަށް ގޮސް އުޅެނިކޮށް ގްރޫޕަކުން ދިން ހަމަލާއެއްގައި މަރުވި ގއ. ވިލިނގިލި ކަނޑުއޮޅި މުހައްމަދު ޝިހާބުގެ މަރުގެ މައްސަލައިގައި ހިމެނޭ ދެ މީހެއްގެ މައްސަލަ އަލުން ބަލަން ހައިކޯޓުން ދެވަނަ ފަހަރަށް ކޮށްފައިވާ އަމުރާ ގުޅިގެން އެ މައްސަލައިގެ އަޑުއެހުންތައް ކްރިމިނަލް ކޯޓުގައި ތިންވަނަ ފަހަރަށް ފަށައިފިއެވެ.

2006 ވަނަ އަހަރުގެ ޖުލައިމަހުގެ ތެރޭގައި ގއ. މާމެންދޫގައި ގްރޫޕަކުން ލަކުޑިބުރިއާއި އެހެނިހެން ތަކެތިން ވިލިނގިލީ ޝިހާބަށް ހަމަލާދީ މަރާމާރީ ހިންގުމުން ލިބުނު އަނިޔާތަކަށް ފަރުވާދެމުން ދަނިކޮށް ޝިހާބު މަރުވީ ހަމަލާދިންތާ ތިން ދުވަސް ފަހުންނެވެ.

ޝިހާބުގެ މަރާ ގުޅިގެން ގއ. މާމެންދޫ، މާސް، އަލީ މަސްއޫދު ސައީދާއި އެރަށު ތަރިވިދާގޭ މުހައްމަދު ގާސިމާއި ޕިންކްލައިޓް މުހައްމަދު ޝިފްރާޒާއި އެރަށު ޖަވާހިރުވާދީ ފަރިޔާޝް އަހުމަދު މަރަން 2008 ވަނަ އަހަރު އޭރުގެ ޖިނާއީ ކޯޓުން ހުކުމްކުރި ނަމަވެސް، އެ ހުކުމްތައް ހައިކޯޓުން 2013 ވަނަ އަހަރު ވަނީ ބާތިލްކޮށްފަ އެވެ.

އަދި ޝިހާބުގެ މަރުގެ މައްސަލާގައި އަލުން ބެލުމަށް ހައިކޯޓުން އަންގާފައި ވަނީ ގއ. މާމެންދޫ، ޕިންކްލައިޓް، މުހައްމަދު ޝާފްރާޒް އާއި ގއ. މާމެންދޫ، މާސް، އަލީ މަސްއޫދު ސައީދުގެ މައްސަލައެވެ.

އެހެންކަމުން ގއ. މާމެންދޫ މާސް އަލީ މަސްއޫދު ސައީދާއި ގއ. މާމެންދޫ ޕިންކްލައިޓް މުހައްމަދު ޝިފްރާޒްގެ މައްސަލަ ކްރިމިނަލް ކޯޓުން އަލުން ބަލައި 2019 ގައި ހުކުމް ކުރީ ހެކިންގެ ހެކިބަހުގައި ގިނަ ފުށުއެރުންތަކެއް ހުރުމާއި ހަމަލާދިންކަން ސާބިތުވި ނަމަވެސް އެމީހުންގެ ނިޔަތް ސާފުނުވާތީ މަދަނީ މިންގަނޑުން މައްސަލަ ކުރިއަށް ނުގެންދެވޭނެ ކަަމަށެވެ.

އެކަމާގުޅިގެން ކްރިމިނަލް ކޯޓުގެ އެނިންމުން ދަޢުލަތުން ހައިކޯޓުގައި އިސްތިއުނާފް ކުރުމުން 2022 ވަނަ އަހަރުގެ ނޮވެމްބަރ 2 ވަނަ ދުވަހު ހައިކޯޓުން ވަނީ ކްރިމިނަލް ކޯޓުގެ އެނިންމުން ބާތިލުކޮށް މައްސަލަ އަލުން ބެލުމަށް ކްރިމިނަލް ކޯޓަށް ދެވަނަ ފަހަރަށް އަމުރުކޮށްފައެވެ.

ހައިކޯޓުގެ އަމުރާ ގުޅިގެން ކްރިމިނަލް ކޯޓުގައި 3 ވަނަ ފަހަރަށް މި މައްސަލައިގެ އަޑުއެހުންތައް މިއަދު ވަނީ ފަށާފައެވެ. އެގޮތުން މިއަދު ބޭއްވި މައްސަލައިގެ ފުރަތަމަ އަޑުއެހުމުގައި މައްސަލަ ބައްލަވާ ޤާޟީ އިބްރާހިމް ޒިހުނީ ވަނީ ދައުވާ ލިބޭ ޝިފްރާޒަށް ވަކީލަކު ހަމަޖައްސަން 10 ދުވަހުގެ ފުރުސަތެއް ދީފައެވެ.

އޭގެއިތުރުން މިއަދަށް ތާވަލު ކުރި އަޑުއެހުމަށް މަސްއޫދު ހާޒިރުވެފައި ނުވާތީ ޤާޟީ ޒިހުނީ ވިދާޅުވީ މަސްއޫދު ހާޒިރު ނުކުރެވުނީ ޗިޓު ރައްދު ނުކުރެވިގެން ކަމަށާއި، ކުރިއަށް އޮތް އަޑުއެހުންތަކަށް މަސްއޫދު ހާޒިރުކުރުމަށް މަސައްކަތް ކުރަށްވާނެ ކަމަށެވެ. އަދި އޭނާ ދިރިއުޅެނީ މާލޭގައިކަން މިހާރު ޔަގީންކުރެވިފައިވާ ކަމަށް ޤާޟީ ވިދާޅުވިއެވެ.

ހަމައެއާއެކު މިއީ ގިނަ ދުވަސްތަކެއް ވެފައިވާ މައްސަލައަކަށްވާތީ ވީއެންމެ އަވަހަކަށް ޝަރީއަތް ކުރިއަށް ގެންގޮސް ނިންމާލުމަށް ބޭނުންވާ ކަމަށްވެސް ޤާޟީ ވިދާޅުވެފައިވެއެވެ.

މި މައްސަލާގައި 2008 ވަނަ އަހަރު ޖިނާއީ ކޯޓުން އިއްވި ހުކުމްގައި ބުނެފައިވަނީ ގއ. ވިލިނގިލީ ކަނޑުއޮޅި މުހައްމަދު ޝިހާބު 2006 ވަނަ އަހަރުގެ ޖުލައި މަހުގެ 14 ވަނަ ދުވަހު މާމެންދޫ އަތިރިފިނިވާގޭގައި ހުއްޓައި ދަޢުވާލިބޭ މީހުން އެގެއަށްވަދެ މުހައްމަދު ޝިހާބުގެ ގައިގައި ލަކުޑި ފަތިބުރިތަކުންނާއި އެމީހުންގެ އަތުންނާއި ފައިން ތަޅާފައިވާ ކަމަށެވެ.

އަދި އެ މާރާމާރީގައި ލިބުނު ޒަޚަމްތަކަށް ބޭސްފަރުވާކުރަމުން ދަނިކޮށް 2006 ޖުލައި 17 ވަނަ ދުވަހު އޭނާ މަރުވެފައިވާ ކަމަށް ވެސް ޖިނާއީ ކޯޓުގެ ހުކުމްގައި ވެއެވެ.