މާލޭގައި މިއަދު ހިނގި އަލިފާނުގެ ބޮޑު ހާދިސާއާއި ގުޅިގެން މާދަމާ ރޭ ބޭއްވުމަށް ތާވަލުކުރި މަސްވެރިންގެ ދުވަހުގެ ރަސްމީ ޖަލްސާ އާއި ރެހެންދި އެވޯޑް ދިނުމުގެ ހަފްލާ ވެސް ފަސްކޮށްފިއެވެ.

އަމީނީމަގު ދިވެހިރާއްޖޭގެ އަޑު ކައިރީގައި ހުންނަ ހައުސިން މިނިސްޓްރީގައި މިއަދު ހެނދުނު ރޯވެ ވަނީ އަނދާ ހުލިވެފައެވެ. އަލިފާންގަނޑު ކޮންޓްރޯލް ނުކުރެވި ކޮންސްޓްރަކްޝަން މިނިސްޓްރީއާއި އެންވަރަމެންޓު މިނިސްްޓްރީ ހިންގަމުން ދިޔަ އިމާރާތްތަކަށްވެސް އަލިފާންގަނޑު ފެތުރި އެއޮފީސްތަށް ބޭނުންނުކުރެވޭ ވަރަށް ހަލާކުވެފައެވެ. މި ހާދިސާއި ގުޅިގެން އެތިން މިނިސްޓްރީގެ ހިދުމަތްތައް ވަގުތީ ގޮތުން މިހާރު ވަނީ ހުއްޓާލާފައެވެ.

މިހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ. ފިޝަރީޒް މިނިސްޓްރީން ނެރުނު ބަޔާނެއްގައި ބުނެފައިވަނީ މިއަދު ހިނގައިދިޔަ ހިތާމަވެރި އަލިފާނުގެ ހާދިސާއާ ގުޅިގެން 44 ވަނަ މަސްވެރިންގެ ދުވަހުގެ މުނާސަބަތުގައި މާދަމާރޭ ދަރުބާރުގޭގައި ބޭއްވުމަށް ހަމަޖެހިފައިވާ ރަސްމީ ހަފުލާ ފަސްކޮށްފައިވާ ކަމަށެވެ. ހަފުލާއަށް ދައުވަތު އަރުވައިފައިވާ ފަރާތްތަކަށް ހަފުލާ ބާއްވާނެ ދުވަހެއް ފަހުން ހިއްސާކުރާނެ ކަމަށް އެ މިނިސްޓްރީން އެބަޔާނުގައި ބުނެފައިވެއެވެ.

އިޖްތިމާއީ އަދި އާއިލީ ތަރައްޤީއާއި ބެހޭ ވުޒާރާއިން ނެރުނު ބަޔާނެއްގައި ބުނެފައިވަނީ މިއަދު ހިނގައިދިޔަ ހިތާމަވެރި އަލިފާނުގެ ހާދިސާއާ ގުޅިގެން 15 ޑިސެންބަރު 2024 ވަނަ ދުވަހުގެ ރޭ ބޭއްވުމާއި ތާވަލުކުރީ 10 ވަނަ ރެހެންދި އެވޯޑު ދިނުމުގެ ހަފްލާ ފަސްކޮށްފައިވާ ކަމަށެވެ. ހަފުލާއަށް ދައުވަތު އަރުވައިފައިވާ ފަރާތްތަކަށް ހަފުލާ ބާއްވާނެ ދުވަހެއް ފަހުން ހިއްސާކުރާނެ ކަމަށް އެ މިނިސްޓްރީން އެބަޔާނުގައި ބުނެފައިވެއެވެ.

އެމްއެންޑީއެފްގެ ފަޔަރ އެންޑް ރެސްކިއު އިން ބުނީ މިއަދުގެ މި ހާދިސާގެ ރިޕޯޓު ސިފައިންނަށް ލިބުނީ މިއަދު 06:27 ހާއިރު ކަމަށެވެ. އެވަގުތުން ފެށިގެން އަލިފާން ނިއްވުމަށް ސިފައިން މަސައްކަތްކުރަމުން ދިޔައިރު އަލިފާންގަނޑު އެއްކޮށް ކޮންޓްރޯލްކުރެވުނީ މިއަދުގެ މެންދުރު ފަހުއެވެ. މި ހާދިސާގައި ހާލުގައި ޖެހުނު 7 ގޭބިސީއެއްގެ 29 މީހަކަށް ނެޝަނަލް ޑިޒާސްޓަރ މެނޭޖެންމެންޓުން އެހީތެރިކަން ފޯރުކޮށްދެމުންދާކަމަށް އެ އިދާރާ އިން ވަނީ ބުނެފައެވެ.