އެމެރިކާގެ ވާގިވެރިކަމާއެކު ލުބުނާނަށް ގަދަކަމުން އަރައި އެތަން ވީރާނާކޮށްލުމަށްފަހު ނިރުބަވެރި އިސްރާއީލުގެ އިސްތިޢުމާރީ ފައުޖުން ލުބުނާނުން ފައިބަން ފަށައިފިއެވެ.

60 ދުވަހަށް ޙަމަލާ ބަދަލުކުރުން ހުއްޓައިލުމަށް އެއްބަސްވެ ލުބުނާނުން ޔަހޫދީ އިސްތިޢުމާރީ ފައުޖުގެ ސިފައިން ދަނީ ފައިބަމުންނެވެ. މިދިޔަ މަހު ލުބުނާނާއި ޔަހޫދީ ދަޢުލަތާ ދެމެދު ވެފައިވާ ޙަމަލާ ބަދަލުކުރުން ހުއްޓާލުމާ ބެހޭ އެއްބަސްވުމުގެ ދަށުން މިކަން ކުރަމުންދާއިރު އެމެރިކާއިން ދަނީ މިކަން އިސްރާއީލުން ކުރޭތޯ ޔަގީން ކުރަމުންނެވެ.

ޔަހޫދީ ޖަމާއަތުގެ ނިރުބަވެރިން ލުބުނާނުން ފޭބުމުގެ މަސައްކަތް ކުރިއަށް ދާ ގޮތް ބައްލަވައިލެއްވުމަށް އެމެރިކާގެ އަސްކަރިއްޔާގެ އިސްވެރިއެއް މިހާރު ވަނީ ލުބުނާނުގެ ވެރިރަށް ބައިރޫތައް ގޮސްފައެވެ.

ނިރުބަވެރި ޖަމާއަތާ އެކު ލުބުނާނުން ވި އެ އެއްބަސްވުމުގެ ދަށުން ލުބުނާނުން ޔަހޫދީ ފައުޖުގެ ސިފައިން ފޭބުމަށް ހަމަޖެހިފައި ވަނީ މަރުހަލާތަކަކަށް ބަހާލައިގެންނެވެ. އަދި ޙިޒްބުﷲގެ ހަނގުރާމަވެރިން ދެކުނު ލުބުނާނުގައި ގާއިމުވެ ތިބި ތަންތަން ދޫކޮށް ލިތާނީ ކޯރުގެ އުތުރަށް ބަދަލުވުން ވެސް އެއްބަސްވުމުގެ ޝަރުތުތަކުގެ ތެރޭގައި ހިމެނެއެވެ.

ނިރުބަވެރިންނާ ލުބުނާނާ ދެމެދު ވެވުނު މި އެއްބަސްވުމުގެ ތަންފީޛީ މަރުހަލާގެ ކަންކަން ބަލަހައްޓައި މެދުވެރިއެއްގެ ދައުރު އަދާ ކުރަނީ ނިރުބަވެރިންނަށް ހިމާޔަތުގައި އޮތް އެމެރިކާއިންނެވެ.