ށ. މިލަންދޫ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ މުހިންމު މަސައްކަތްތައް ނިމިފައިވާކަން އެ މަސައްކަތާ ހަވާލުވެފައިވާ ރޯޑް ޑިވެލޮޕްމަންޓް ކޯޕަރޭޝަން(އާރްޑީސީ) އިން ބުނެފިއެވެ.

މި މަސައްކަތް އާރްޑީސީ އާއި ހަވާލުކުރީ 12 މާރިޗް 2020 ގައެވެ. އަދި އެ އަހަރުގެ ސެޕްޓެމްބަރު މަހުގައި އެ ކުންފުނިން ވަނީ މި މަސައްކަތުގެ އަމަލީ މަސައްކަތް ފަށާފައެވެ.

އާރްޑީސީ އިން ބުނީ މި މަސައްކަތުގައި މިހާރު ކުރިއަށްދަނީ އިމާރާތް ކުރުމާއި ބިނާރާއި ބެހޭ ވުޒާރާއިން މި މަޝްރޫޢުގެ "ފައިނަލް އިންސްޕެކްޝަން" ހެދުމުގެ މަރުޙަލާ ކަމަށެވެ.

މި މަޝްރޫއަށް ސަރުކާރު 156،477،632.23 ދިވެހި ރުފިޔާ ހަރަދުކޮށްފައިވާއިރު މި މަޝްރޫއުގެ ދަށުން ޖުމްލަ 6.3 ކިލޯމީޓަރުގެ ދިގުމިން ހިމެނޭހެން ނުވަ މަގެއް ޒަމާނީ ފެންވަރަށް ތަރައްޤީ ކުރުމުގެ މަސައްކަތް އާރްޑީން ވަނީ ކޮށްފަ އެވެ.

މިލަންދޫގެ މަގުތައް ޒަމާނީ ފެންވަރަށް ތަރައްގީ ކުރަނީ ސްޓޯރމް ވޯޓަރ ނެޓްވޯކާއި ކޭބަލް ޖަންކް އަދި ސްޓޯމް ވޯޓަރ ޕަމްޕުތައް ހިމެނޭ ހެން ފެން ހިންދާ ނިޒާމާއެކުގައެވެ. އަދި ހުރިހާ މަގެއްވެސް ތަރައްޤީ ކުރެވިފައިވަނީ ތާރު އަޅައިގެންނެވެ.