ކޮންމެ ދުވަހަކުވެސް މުޅި ދުވަހު މަސައްކަތުގައާއި ރައްޓެހިންނާއެކު ބޭރުގައި އުޅެފައި ގެއަށް އަންނައިރު އެންމެންވެސް ތިބެނީ ވަރަށް ބޮޑަށް ދާހިއްލާފައެވެ. އަދި އޭގެ ސަބަބުން ރޭގަނޑު ނިދުމުގެ ކުރިން ރަނގަޅަށް ފެންވަރާލައި ރީތިވެލަން ކޮންމެ މީހަކުވެސް ބޭނުން ވެއެވެ. އަދި މިހެންވެ ރޭގަނޑު އިސްތަށިގަނޑު ދޮވެގެން ފެންވަރާ މީހުންވެސް އަޅުގަނޑުމެންގެ ތެރޭގައި މަދެއް ނޫނެވެ. ނަމަވެސް މިގޮތަށް ރޭގަނޑު އިސްތަށިގަނޑު ދޮންނަނަމަ ވަރަށް ގިނަ މައްސަލަތައް ދިމާވެއެވެ.

އެގޮތުން ދިމާވާ އެންމެ ބޮޑު އެއް މައްސަލައަކީ ބޮލުން އިސްތަށި ފޭބުމެވެ. މިކަން މިހެން ދިމާވަނީ ރޭގަނޑު އިސްތަށިގަނޑު ދޮވުމަށް ފަހު ރަނގަޅަށް ނުހިކެނީސް ނިދޭތީއެވެ. މިގޮތަށް އިސްތަށިގަނޑު ނުހިކެނީސް ނިދަން އޮށޯތުމުން ބާލީހުގައި އިސްތަށިތައް ހޭކި އޭގެ ސަބަބުން އިސްތަށިގަނޑުގައި ގޮށް ޖެހެއެވެ. އަދި އޭގެ ސަބަބުން ހެނދުނު ފުނާ އަޅާ ގަޑީގައި އިސްތަށިތައް ބުރިވެ އިސްތަށި ފޭބުމަށް މެދުވެރިވެއެވެ.

ރޭގަނޑު އިސްތަށިގަނޑު ދޮވުމުން ދިމާވާ އަނެއް މައްސަލައަކީ ބޮލުގައި ހަންފޮޅުމެވެ. މިކަން މިހެން ވަނީވެސް އިސްތަށިގަނޑު ރަނގަޅަށް ނުހިކެނީސް ނިދަން އޮށޯންނާތީއެވެ. އިސްތަށިތައް ތެއްކޮށް ހުއްޓައި ނިދަން އޮށޯތުމުން ބޮލުގެ ހަންގަނޑު ހިއުމިޑްވެ، އޭގެ ސަބަބުން ހަންގަނޑު ވަރަށް ބޮަޑަށް ހިކެއެވެ. އަދި އޭގެ ސަބަބުން ބޮލުގައި ހަންފޮޅެއެވެ.

މީގެ އިތުރުން ހަންގަނޑުގައި ހުންނަ ޕްރޮޓެކްޓިވް ބެރިއަރު ހަލާކުވެ އިސްތަށިގަނޑު ހަލާކު ވުމަކީވެސް ރޭގަނޑު އިސްތަށިގަނޑު ދޮންނަ ނަމަ ވަރަށް ގިނަ މީހުންނަށް ދިމާވާ މައްސަލައެކެެވެ. މި މައްސަލަތައް ދިމާވުމަށް މެދުވެރިވާ އެންމެ ބޮޑު މައްސަލައަކީ ނިދުމުގެ ކުރިން އިސްތަށިގަނޑު ރަނގަޅަށް ނުހިއްކުމެވެ.

ވީމާ މިކަމަށް ސަމާލުވެ، ރޭގަނޑު އިސްތަށިގަނޑު ދޮވުނު ނަމަވެސް ރަނގަޅަށް އިސްތަށިގަނޑު ހިއްކަން ސަމާލުވާން ޖެހެއެވެ. އަދި އެވަރަށް ވަގުތު ނެތްނަމަ ރޭގަނޑު އިސްތަށިގަނޑު ދޮވުން ހުއްޓާލުމަކީ ވަރަށްވެސް މުހިންމު ކަމެކެވެ.

މަސްދަރު: އީޓައިމްސް