މިދިޔަ ބުރާސްފަތި ދުވަހު މާލޭގައި ހިނގި އަލިފާނުގެ ހާދިސާއާއި ގުޅިގެން އަދިވެސް 22 މީހަކު ތިބީ ވަގުތީ ބޯހިޔާވަހިކަމުގައި ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

އެންޑީއެމްއޭ އިން ބުނީ އަލިފާނުގެ ހާދިސާގައި ވަގުތީ ހިޔާތަކަށް ބަދަލުކުރެވުނު 29 މީހުންގެ ތެރެއިން ފަސް މީހުން އެފަރާތްތަކުގެ ގެއަށް ބަދަލުވެފައިވާ ކަމަށާއި ބާކީ 22 މީހުންނަށް ފަސް ދުވަހަށް ވަގުތީ ބޯހިޔާވަހިކަން އިތުރުކުރެވިފައިވާ ކަމަށެވެ.

ގްރީން ބިލްޑިންގައި ހިނގި މި އަލިފާނުގެ ހާދިސާގައި އެ އިމާރާތް ބޭނުން ނުކުރެވޭ ވަރަށް އަނދާފައިވާއިރު އެ އިމާރާތަކީ ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީ ހިންގަމުންދިޔަ އިމާރާތެވެ. އަދި، އެ އިމާރާތާ އިންވެގެން ހުރި އެންވަޔަރަމެންޓް މިނިސްޓްރީގެ ވެސް ބޮޑުބައެއް ވަނީ ބޭނުން ނުކުރެވޭ ވަރަށް އަނދައިގެން ގޮސްފަ އެވެ.

ސަރުކާރުން ވަނީ މި އަލިފާނުގެ ހާދިސާގައި ގެއްލުންވި މިނިސްޓްރީތަކުގެ މަސައްކަތްތައް ދަރުބާރުގެއަށް މިހާރު ބަދަލުކޮށްފައެވެ. އަދި އަލިފާނުގެ ހާދިސާ ހިނގި ގޮތް މިހާތަނަށް އެނގިފައި ނުވާއިރު، އެކަމުގެ ތަހުގީގަށް ބޭރުގެ އެހީ ހޯދުމަށް ސަރުކާރުގެ ކަމާބެހޭ ފަރާތްތަކުން ވަނީ ނިންމާފަ އެވެ.