މަޝްހޫރު ޔޫޓިއުބަރު މިސްޓަރ ބީސްޓް ޔޫޓިއުބު ވީޑިއޯއެއް ހެދުމަށްޓަކައި މިސްރުގެ އަހުރާމުތައް ކުއްޔަށް ނަގައިފިއެވެ.

މިސްރުގެ އަހުރާމުތަކަކީ ދުނިޔޭގެ ހަތް އަޖައިބުތަކުގެ ތެރެއިން އެއް އަޖައިބެވެ. ދާދި ފަހުން ޕޮޑްކާސްޓެއްގައި ވާހަކަ ދައްކަމުން މިސްޓަރ ބީސްޓް ވަނީ ވީޑިއޯއެއް ހެދުމަށްޓަކައި މިސްރުގެ އަހުރާމުތައް ކުއްޔަށްނެގި ކަމަށް ބުނެފައެވެ.

އެގޮތުން އޭނާ އަހުރާމުތައް ކުއްޔަށް ނަގާފައިވަނީ 100 ގަޑިއިރަށް ކަމަށާއި، އަހުރާމުތައް ހޯދައިބަލަމުން ވީޑިއޯއެއް ހަދަން ނިންމާފައިވާ ކަމަށް އޭނާ ވަނީ ބުނެފައެވެ. އަދި އެ 100 ގަޑިއިރަށް އަހުރާމުތަކުގައި އުޅޭނީ އޭނާއާއި އޭނާގެ ޓީމު ކަމަށާއި އެމީހުން ނިދާނީވެސް އެތަނުގައި ކަމަށް މިސްޓަރ ބީސްޓް ވަނީ ބުނެފައެވެ.

އޭނާ އިތުރަށް ބުނެފައިވަނީ އަހުރާމުތަކުގެ އެތެރެ މީގެ ކުރިން ދުވަހަކުވެސް ފެނިފައިނުވާ ކަމަށާއި، އެތާގައި ފޮރުވިފައިވާ ސިއްރުތައް ބަލަން ބޭނުންވާ ކަމަށެވެ. އަދި އެމީހުންގެ ޓުއަރ ގައިޑު މީގެ ކުރީގައި އެއްވެސް ބަޔަކަށް ފެނިފައިނުވާ ތަންތަން އެމީހުންނަށް ދައްކާނެ ކަމަށްވެސް އޭނާ ވަނީ ބުނެފައެވެ.

ފާއިތުވި އަހަރުތަކުގައި މިސްޓަރ ބީސްޓް ވަނީ ތަފާތު އެކި ޔޫޓިއުބު ޗެނަލްތައް މެދުވެރިކޮށް، މިފަދަ އެތައް ވީޑިއޯތަކެއް ހަދައި އެތައް ބައެއްގެ ސަމާލުކަން ހޯދާފައެވެ. އޭނާގެ ހުރިހާ އެކައުންޓުތަކެއް އެއްކޮށްލާއިރު 415 މިލިއަން ސަބްސްކްރައިބަރުން ހިމެނޭ ކަމަށް ރިޕޯޓުތައް ބުނެއެވެ.

މަސްދަރު: ހިންދުސްތާނުޓައިމްސް