މާލޭގެ މަގެއްގެ މަތިން ސައިކަލެއްގައި ދިޔަ އަންހެނެއްގެ އަތުން ފޭރެން މަސައްކަތް ކުރި މީހަކު ހައްޔަރުކޮށްފިއެވެ.

މާލޭގައި ރޯމާ ދުވާލު މަގުމަތިން ސައިކަލުގައި ދިޔަ އަންހެނެއްގެ ފަހަތުން، ސައިކަލުގައި އައި ފިރިހެނަކު އަންހެން މީހާގެ ކަރުގައި އޮތް ފަށެެއް ފޭރެން މަސައްކަތް ކުރާ ވީޑިއޯ އެއް ވަނީ އާންމުވެފައެވެ. ފުލުހުންގެ ތަރުޖަމާން މުހައްމަދު ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ، ފޭރުނު މައްސަލައާ ގުޅުން ހުރި މީހާ ހައްޔަރުކޮށްފައިވާ ކަމަށެވެ. އަދި ތަހުގީގަށް އޭނާ ދުއްވަން އިން ސައިކަލުވެސް ފުލުހުންގެ ބެލުމުގެ ދަށަށް ގެނެސްފައިވާ ކަމަށްވެސް ޝިފާން ވިދާޅުވިއެވެ.

ޝޯޝަލް މީޑިޔާގައި މިއަދު އާންމުވި ވީޑިއޯ އިން ފެންނަނީ މާލޭގެ މަގުމަތިން ސައިކަލެއްގެ ދިޔަ އަންހެނެއްގެ ކަރުގައި އޮތް ފަށެެއް ފިރިހެނަކު ފޭރެން މަސައްކަތް ކުރާ މަންޒަރެވެެ. ފަށް ފޭރެން ކުރި މަސައްކަތް ކާމިޔާބު ނުވުމުން ދެން ހެލްމެޓް އަޅައިގެން ހުރި އެ ފިރިހެންމީހާ މަސައްކަތް ކުރީ އެ އަންހެންމީހާގެ އަތުގައި އޮތް ދަބަސް ޖަހައިގަންނާށެވެ. އެކަން ވެސް ކާމިޔާބުނުވުމުން އެންމެ ފަހުން ސައިކަލަށް އަރައިގެން އެމީހާ ވަނީ އެ ސަރަހައްދު ދޫކޮށް ފިލާފައެވެ. އެވަގުތު އެސަރަހައްދުގައި ބައެއް އާންމުން ވެސް މަންޒަރު ބަލަން ތިބިއިރު އޭގެ ތެރެއިން އެކަކު ވަަނީ އެ އަންހެން މީހާގެ ސައިކަލު ނަގައި އެމީހާ އަށް އެހީތެރިވެ ދީފައެވެ.