ގެދޮރުވެރިޔާ ސްކީމާއި ބިންވެރިޔާ ސްކީމާ ގުޅޭ ގޮތުން އެއްވެސް ޝަކުވާއެއް އޮތް ނަމަ ހުށަހެޅުމަށްޓަކައި ފުލުހުން ޕޯޓަލެއް ގާއިމްކޮށްފިއެވެ.

ފުލުހުންގެ ޚިދުމަތުން އެކްސްގައި މިރޭ ކުރި ޕޯސްޓެއްގައި ބުނެފައިވަނީ ގެދޮރުވެރިޔާ އަދި ބިންވެރިޔާ ސްކީމާގުޅޭ މައްސަލައިގެ ތަހުގީގުގަށް ބޭނުންކުރެވިދާނެ ކަމަށް ބެލެވޭ އެއްވެސް މައުލޫމާތެއް ނުވަތަ ހެކީގެ ގޮތުގައި ބޭނުންކުރެވިދާނެ އެއްވެސް ލިޔުމެއް އޮތްނަމަ އެ ލިޔުމެއް ހިއްސާކުރުމަށް އެދޭ ކަަމަށެވެ. އަދި އެފަދަ ލިޔުމެއް އޮތް ފަރާތަކުން ހިއްސާކުރެވޭނެ ޕޯޓަލް ވެސް ފުލުހުން ވަނީ އާންމުކޮށްފައެވެ.

ގެދޮރުވެރިޔާ އަދި ބިންވެރިޔާ ސްކީމާގުޅޭ މައްސަލައިގެ ތަހުގީގުގަށް ބޭނުންކުރެވިދާނެ ކަމަށް ބެލެވޭ އެއްވެސް މައުލޫމާތެއް ނުވަތަ ހެކީގެ ގޮތުގައި ބޭނުންކުރެވިދާނެ އެއްވެސް ލިޔުމެއް އޮތްނަމަ، https://t.co/ZO4hk7yBKy އަށް ވަޑައިގެން ހިއްސާކުރެއްވުން އެދެމެވެ.
1/2

— Maldives Police (@PoliceMv) December 21, 2024

ފުލުހުން ބުނީ‏ އެ އިދާރާއާ މައުލޫމާތު ހިއްސާކުރާއިރު އަމިއްލަ މައުލޫމާތު ހާމަނުކޮށް ނުވަތަ ތަހުގީގުކުރާ ފަރާތްތަކުން ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާއެކުވެސް ހިއްސާކުރެވިދާނެ ކަމަށެވެ.

"އަދި، މައުލޫމާތު ހިއްސާކުރައްވާ ފަރާތްތަކުގެ ސިއްރުކަން ހިފަހައްޓާނެ ކަމުގެ ޔަގީންކަން އަރުވަމެވެ." ފުލުހުންގެ ޕޯސްޓުގައި ބުނެފައިވެއެވެ.

ގެދޮރުވެރިޔާ ސްކީމާއި ބިންވެރިޔާ ސްކީމާ ގުޅޭ ހާއްސަ ތަހުގީގެއް ފުލުހުން މިހާރު ވަނީ ފަށާފައެެވެ. އެ ތަހުޤީޤަކީ އޭސީސީއާ ގުޅިގެން ހިންގާ ތަހުޤީޤެކެެވެ.