އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދަށް ތުހުމަތުވާ ހިޔާނާތާއި ވައްކަމުގެ ގިނަ މައްސަލަތަކުގެ ތަފްސީލު، އެ ކުންފުނީގެ ކުރީގެ ޗެއާމަން އަހްމަދު ޒުހޫރު، އެމަނިކުފާނުގެ ސަމާލުކަމަށް މީގެ ފަސް މަސް ކުރިން ގެނެސްފައިވާކަމަށް ބުނާ ސިޓީއެއް ސޯޝަލް މީޑިއާގައި އާންމުވި ނަމަވެސް އެ ސިޓީ ލިބިވަޑައިނުގަންނަވާ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

މިއަހަރުގެ ފެބްރުއަރީ މަހު އެޗްޑީސީގެ ޗެއާމަން ކަމަށް އައްޔަނުކުރުމަށްފަހު، މެއި މަހު އެ މަގާމުން ވަކިކޮށްފައިވާ ޒުހޫރު، ރައީސް މުއިއްޒަށް ފޮނުއްވާފައިވާ ކަމަށްބުނާ ހަތް ސަފްހާގެ ސިޓީއެއް ވަނީ މީސްމީޑިއާގައި އާންމުކޮށްފައެވެ.

ރައީސް އޮފީހުގެ ބޭރުގައި ހުންނަވައިގެން ނޫސްވެރިންނަށް މައުލޫމާތު ދެއްވަމުން ރައީސް ޑރ. މުޙައްމަދު މުޢިއްޒު ވިދާޅުވީ، އެފަދަ ސިޓީއެއް އެމަނިކުފާނަށް ލިބިވަޑައިނުގަންނަވާ ކަމަށެވެ. ރައީސް ވިދާޅުވީ ކޮރަޕްޝަނާއި ގުޅޭ ކަމެއް އެމަނިކުފާނާއި ހިސާބަށް އައިސްފިނަމަ ނުބައްލަވައި ދޫކޮށް ނުލައްވާނެ ކަމަށެވެ. އަދި އޮންނަ އުސޫލުގެ މަތިން އެފަދަ މައްސަލަތައް ބަލައި ފިޔަވަޅު އަޅުއްވާނެ ކަމަށް ރައީސް ވިދާޅުވިއެވެ.

"ސިޓީއެއް އަޅުގަނޑަށް ލިބި އަމަލު ނުކޮށް އޮތް ކަމަށް އެ ދައްކާ ވާހަކައަކީ އެއީ ހަގީގީ ވާހަކައެއް ނޫން، އަޅުގަނޑަކަށް ނެތް އެސިޓީ އެއް، ލިބިފައެއް ނެތް އެ ސިޓީއެއް،" ރައީސް ވިދާޅުވިއެވެ.

ރައީސް އިތުރަށް ވިދާޅުވީ މިއަދާ ހަމައަށް އައިއިރު ވެސް އެ ފަދަ މައުލޫމާތެއް ލިބިވަޑައިގެންފިނަމަ ކަމާ ގުޅުންހުރި އިދާރާތަކަށް ފިޔަވަޅު އަޅަން އަންގަވައިފައިވާނެ ކަމަށެވެ. އެގޮތުން އެޗްޑީސީގެ މައްސަލަ ސަމާލުކަމަށް އައުމާއެކު ފުލުހަށް އެ ކަން ތަހުގީގުކުރަން އަންގަވައިފައިވާ ކަމަށް ރައީސް ވިދާޅުވިއެވެ. ރައީސް ވިދާޅުވީ ކޮރަޕްޝަންގެ އަމަލެއް ނުވަތަ ގާނޫނާއި ގަވާއިދާއި ހިލާފު އަމަލެއް ހުއްޓުވުމަށް އެމަނިކުފާނު ފަސްޖެހިވަޑައިނުގަންނަވާނެ ކަމަށެވެ.