އެޗްޑީސީގެ މެނޭޖިން ޑިރެކްޓަރަކަށް މިއަދު އައްޔަން ކުރެއްވި މައުރޫފް ޖަމީލަށް ވަރަށް ބޮޑަށް އިތުބާރު ކުރައްވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް އޮފީހުގެ ބޭރުގައި މިއަދު މެންދުރުފަހު ބައެއް ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ޑރ. މުޙައްމަދު މުޢިއްޒު ވިދާޅުވީ، އެޗްޑީސީގެ މައްސަލަ އެ މަނިކުފާނުގެ ސަމާލުކަމަށް އައި ހިސާބުން ފިޔަވަޅު އަޅުއްވާފައިވާނެ ކަމަށެވެ. އެގޮތުން ކަމާބެހޭ ފަރާތްތަކުން މިހާރު އަޅަމުން އަންނަ ފިޔަވަޅުތަކާއެކު، އެޗްޑީސީ އަށް ރަނގަޅު ބަދަލެއް އަންނާނެ ކަމަށް ރައީސް މުއިއްޒު ވިދާޅުވި އެވެ.

"އެޗްޑީސީ އަށް އަޅުގަނޑު މިއަދު މި އައްޔަންކުރި، ކުރީގެ މިނިސްޓަރު މައުރޫފް ޖަމީލް. އެ ބޭފުޅާއަކީ އަޅުގަނޑު ވަރަށް އިތުބާރު ކުރާ، ފުލް އިންޓެގްރިޓީ ހިފަހައްޓާނެ ބޭފުޅެއް. ފުލް ކޮމިޓްމެންޓާއި ޕްރޮފެޝަނަލިޒަމްއާ އެކު މަސައްކަތްކުރައްވާ ބޭފުޅެއް،" ރައީސް މުޢިއްޒު ވިދާޅުވި އެވެ.