ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރަކަށް އައްޔަން ކުރެއްވި މައުރޫމް ޖަމީލަކީ ނަޒާހަތްތެރި، ގާބިލް، ތަޖުރިބާ ހުރި ބޭފުޅެއް ކަމަށް ކުރީގެ ރައީސް އަލްއުސްތާޒު މައުމޫން އަބްދުލްގައްޔޫމް މިއަދު ވިދާޅުވެއްޖެއެވެ.

އެޗްޑީސީގެ މެނޭޖިން ޑިރެކްޓަރުގެ މަގާމަށް މައުރޫފް ޖަމީލް ރައީސް މިއަދު ވަނީ އައްޔަން ކުރައްވާފައެވެ. މައުރޫފް އެމަގާމަށް އައްޔަން ކުރީ އެ ކުންފުނީގެ މެނޭޖިން ޑިރެކްޓަރު ކަމުގެ މަގާމުގައި ހުންނެވި އިބްރާހިމް ފަޒުލް ރަޝީދަށް ކުރެވުނު ކޮރަޕްޝަންގެ ތުހުމަތުތަކާއި ގުޅިގެން ސަސްޕެންޑް ކުރުމުން މަގާމުން އިސްތިއުފާ ދެއްވުމުންނެވެެ.

އެކްސްގައި ކުރެއްވި ޕޯސްޓެއްގައި، ކުރީގެ ރައީސް މައުމޫން ވިދާޅުވީ އެޗްޑީސީގެ އިސްވެރިއަކަށް މައުރޫފް ޖަމީލް ފަދަ ނަޒާހަތްތެރި، ގާބިލް، ތަޖުރިބާ ހުރި ބޭފުޅަކު އައްޔަން ކުރެއްވުމުން އުފާފުޅުކުރައްވާ ކަމަށެވެ. އަދިި މައުރޫފަށް ކާމިޔާބީ އަށް މައުމޫން ވަނީ އެދިވަޑައިގެންފައެވެ.

މައުރޫފް ޖަމީލު ވަނީ ރައީސް މައުމޫންގެ ސަރުކާރުގައި ކޮންސްޓްރަކްޝަން މިނިސްޓަރުކަން އަދާކުރަށްވާފައެވެ. މައުމޫންގެ ވެރިކަމުގައި ހުޅުމާލެ ހިއްކި ދުވަސްވަރުގައި ހުޅުމާލެ ޑިވެލޮޕްމަންޓް ޔުނިޓުގެ ވެރިޔާގެ ހައިސިއްޔަތުން ހުޅުމާލޭގެ ތަރައްގީއަށް މައުރޫފް ގިނަ މަސައްކަތްތަކެއް ކުރައްވާފައިވާއިރު އެޗްޑީސީ އުފެއްދެވުމާއެކު، ކުންފުނީގެ ސީއީއޯގެ މަގާމު ދުވަސްކޮޅަކަށް އޭނާ އަދާކުރެއްވިއެވެ.