އާ އަހަރާ ދިމާކޮށް މަސްތުވާތަކެތި ބޭނުން ކުރުމާއި ވިއްކުން އިތުރުވާނެ ކަމަށް ލަފާ ކުރެވޭތީ ފުލުހުންގެ ހާއްސަ އޮޕަރޭޝަނެއް ފަށާފައިވާ ކަމަށް ފުލުހުން ބުނެފިއެެވެ.

ފުލުހުންގެ ޚިދުމަތުން ބުނީ މި ދުވަސްވަރު ބަނގުރަލާއި މަސްތުވާތަކެތި ބޭނުންކޮށް، ވިޔަފާރިކުރުން އިތުރުވެގެންދާނެ ކަމަށް ބެލެވޭތީ ޑްރަގްސް އެންފޯސްމަންޓް ޑިޕާޓްމަންޓް (ޑީއީޑީ) އާއި ހުޅުމާލެ ޕޮލިހާއި މެރިން ޕޮލިސް އަދި ކ. އަތޮޅުގެ ޕޮލިސް ސްޓޭޝަންތައް ގުޅިގެން އޮޕަރޭޝަނެއް ފަށާފައިވާ ކަމަށެވެ. މި އޮޕަރޭޝަނުގައި ހުޅުމާލެ ފަޅުތެރެ ޕެޓްރޯލް ކުރުމާއި ރަށުތެރެއަށް ބަނގުރާ އަރުވައި އަދި އެ ބާވަތްތައް ވިއްކާ ކަމަށް ޝައްކު ކުރެވޭ ކެފޭތަކާއި ރެސްޓޯރެންޓްތައް މޮނީޓާކޮށް، ގާނޫނާއި ގަވާއިދާ ހިލާފުވާ ފަރާތްތަކާ މެދު ފިޔަވަޅު އަޅާނެ ކަމަށް ފުލުހުން ބުނެއެވެ.

ކޮންމެ އަހަރަކުވެސް އާ އަހަރާއި ދިމާކޮށް މާލެ ސަރަހައްދާއި ލޯކަލް ޓޫރިޒަމް އޮންނަ ރަށްރަށާއި ސަފާރީތަކުން މަސްތުވާތަކެއްޗާއި ބަނގުރާ ފަދަ އެއްޗެހި އަތުލައިގަންނަން ފުލުހުން ޚާއްސަ އޮޕަރޭޝަންތައް ހިންގައެވެ.