އެހެން ދީން ތަކުގެ ދުވަސްތައް ރާއްޖޭގެ ރަށްރަށުގައި ފާހަގަނުކުރުމަށް އިސްލާމިކް މިނިސްޓްރީން އަނެއްކާ ވެސް އިލްތިމާސްކޮށްފިއެވެ.

އިސްލާމިކް މިނިސްޓްރީން މިކަމަށް އިލްތިމާސްކޮށްފައިވަނީ ނަޞާރާއިން ފާހަގަކުރާ ޢީދެއް ކަމަށްވާ "ކްރިސްމަސް” ދުވަހާ ގުޅިގެންނެވެ.

އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ސޮއި ކުރައްވައި، ކައުންސިލްތަކަށް ފޮނުއްވި ސާކިއުލާއެއްގައި، ބުނެފައިވަނީ ދިވެހިރާއްޖޭގެ އެެއްވެސް އާއްމު ތަނެއްގައި އިސްލާމް ދީން ފިޔަވައި އެހެން އެއްވެސް ދީނެއްގެ އަޅުކަމާ ގުޅޭ އެއްވެސް ކަމެއް ހިންގުމަކީ ކަނޑައެޅިގެން މަނާ ކަމެއްކަމަށް ހަނދާން ކޮށްދޭކަމަށެވެ. އެ ސާކިއުލާގައި ބުނީ ރާއްޖެއަކީ ގިނަ އަދަދަކަށް ބިދޭސީން މަސައްކަތްކުރާ، އަދި ފަތުރުވެރިންގެ ގޮތުގައި ގިނަ އަދަދެއްގެ ބޭރު މީހުން ޒިޔާރަތްކުރާ ގައުމެއް ކަމަށްވާއިރު އެކި ވަޒީފާތަކަށް ބިދޭސީން ގެންނަ ފަރާތްތަކުން ރާއްޖޭގެ ގާނޫނާއި ގަވާއިދުތަކާ އެއްގޮތައް އަމަލުކުރުމަށް ބިދޭސީނަށް އިރުޝާދު ދިނުމަށް އެދޭ ކަމަށެވެ.

މީގެ އިތުރުން މީހުން އުޅޭ ރަށް ރަށުގައި އުޅޭއިރު އާއްމު އިޖްތިމާއީ މިންގަނޑަށް ފެތޭފަދަ ހެދުމެއްގައި އުޅުމަށް ފަތުރުވެރިންނަށް އިރުޝާދު ދިނުމަށް ވެސް ވަނީ މިނިސްޓްރީން އަންގާފައެެވެ. އަދި ހުރިހާ ކައުންސިލްތަކުން މި ކަމަށް ޚާއްސަ ސަމާލުކަމެއް ދީ މިފަދަ މައްސަލަތަކުގައި ފިޔަވަޅުތައް އަޅަމުން ގެންދިޔުމަށް މިނިސްޓްރީ އިން ވަނީ އެދިފައެވެ.