ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް 24 ގަޑިއިރުތެރޭގައި ހާހެއްހާ ފްލައިޓް ޖައްސާ ފުރުމުގެ ރެކޯޑެއް ހަދައިފިއެވެ.

ވީއައިއޭގައި އެއް ދުވަސް ތެރޭގައި 1،000 އަށްވުރެ ގިނަ ފްލައިޓް ހަރަކާތް ހިނގުމަކީ އެއާޕޯޓުގެ އޮޕަރޭޝަނަލް ތާރީހުގައި ބޮޑު ކާމިޔާބީއެއް ހޯދި ފުރަތަމަ ފަހަރުކަން ފާހަގަ ކުރެވެއެވެ. އަދި މި ފާހަގަކޮށްލެވޭ ކާމިޔާބީއަކީ މި ސަރަޙައްދުގެ މައި ހަބެއްގެ ގޮތުގައި އެއަރޕޯޓުގެ މުހިންމުކަން އިތުރުވަމުންދާކަން ހާމަކޮށްދޭ ކާމިޔާބީއެކެވެ.

ރާއްޖޭގެ މައި ވައިގެ ބަނދަރު، ވީއައިއޭގައި 24 ގަޑިއިރުގެ ތެރޭގައި 234 ރަންވޭ މޫވްމަންޓާއި 766 ސީޕްލޭން މޫވްމަންޓް ވަނީ ރިކޯޑުކުރެވިފައެވެ.

ރާއްޖެއަށަް އެންމެ ގިނައިން ފަތުރުވެރިން ޒިޔާތްކުރާ ދުވަސްވަރަކީ ޑިސެމްބަރު މަސް ކަމަށްވާއިރު މިއަހަރަކީ ރާއްޖެއަށް ފަތުރުވެރިން ޒިޔާރަތްކުރި އަދަދު މީގެ ކުރީ އަހަރުތަކާ އަޅައިބަލާއިރު އިތުރުވި އަހަރެއްކަން ފާހަގަ ކުރެވެއެވެ. އެގޮތުން ވީއައިއޭގައި އެއާ ޓްރެފިކް މޫވްމަންޓް ވަރަށް ބޮޑަށް އިތުރުވެފައިވާއިރު މިއަހަރުގެ މިހާތަނަށް ރާއްޖެއަށް 1978252 ފަތުރުވެރިން ވަނީ ޒިޔާރަތްކޮށްފައެވެ.